Tura-ni private hospital-rangna a·dokni CM, tangka paisarangko on·anga

TURA: Meghalaya a·dokni private hospital-rangna tangka paisani gita dakchakanirangko on·na aro non-profit hospital-rang baksa nangrime kamko ka·angna miksonganio a·dokni Chief Minister Conrad K Sangma, Sombar salo, Tura Christian Hospital aro Tura Holy Cross Hospital-na skanggipa instalment-ni bak gita gong krorsa-ni cheque-rangko, Tura Mission Compound-o donggipa Working Women’s Hospital-o pakwate on·angaha.
Meghalaya Health Advancement Policy-ni ning·o Meghalaya a·dokni dingtang dingtang private hospital-rangna tangka paisani gita dakchakanirangko on·engani gimin ia salni bako, Tura Christian Hospital aro Holy Cross Hospital-rangnaba gong kror 2-ko Chief Minister-ni jakchi pakwate on·angaha.
Ia tom·aniko ong·atanio a·dokni Chief Minister, jinmana aganprakengon, sanna bananirangchi bang·en kamrangko dangdike on·engani gimin Tura Christian Hospital-ko mittelpilangenba, mikkangchiba apsan daken, songsalna dangdike on·angkuchina didianiko on·angaha.
Shillong Medical College-ko ia 2025 bilsini September jaon kulignok indiba Tura Medical College-kode re·baenggipa 2026 bilsini September jaosa kulina man·aignok ineba ia tom·anio Chief Minister parakangaha.
Bijolirangko chu·onga gita on·na man·jaengani a·sel neng·nikanirangko chagrongna nangtokengani gimin janapatengon, ia sal somoirango load shedding-ko bewalan komiatna man·ahaoba bijoliko on·anio neng·nikanirangko chagrongna nangkuenga aro dingtang dingtang neng·nikanirangko chagrongna nanggenchimoba Garo Hills-o damgittam gital power substation-rangko kulina siengaha ine Chief Minister parakataha.
CM Care Plus project-ni gimin talataniko on·angskaengon, ia project-ni ning·o cholgri ong·gipa manderangna, operation ka·ani, ka·rongte teksreani aro cancer saanirangko sannanirango gong lak 3-oni lak 10-ona dakchake on·ani donggen ine Sangma aganaha.
Medical doctor-rang da·o Tura Christian Hospital gita dakgipa je hospital-rangoba kam ka·na man·aignok ine janapatengon, iandakgipa hospital-rangko kamrangko ka·ahaon uamangni bond seanirangkoba sorkari ra·chakanggen ine Chief Minister parakataha.