TURA: Garo Hills-o Early Childhood Development (ECD) Mission-ni kamrangko bilakbatatna aro pilak biaprangonan sokatna gita Meghalaya sorkari, Tura Catholic Diocese-ni Bakdil dol baksa, Memorandum of Understanding (MoU)-o soi ka·grikangaha.
MoU-o soi ka·grikaniko Tura-ni St Luke’s Church-o ECD-ni program-ko ong·atanio dakangaha aro ia tom·anio, a·dokni Chief Minister Conrad K Sangma-ba dongpae bak ra·angaha.
Ia songgigrikaniko bilsnignina soi ka·grikaha aro iano Parish-ni Father-rang, songo noko Catholic bebera·giparang, Procharokrang aro Sister-rangba, Meghalaya Early Childhood Development Mission (MECDM) baksa bakrime, Garo Hills-ni dambonga a·jarang, chong·motan East Garo Hills, West Garo Hills, South Garo Hills, North Garo Hills aro South West Garo Hills a·jarango, an·o donggipa me·chikrangna simsak nirokanirangko on·angan baksana bi·sarangko chonengmitingonin skie ra·atna gita kamrangko ka·anggen.
MoU-o a·dok sorkarini pal, Principal Secretary aro Development Commissioner Sampath Kumar aro Bakdil-ni pal, Tura Diocese-ni Bishop Rt Rev Andrew R Marak, soi ka·angaha. Ia soi ka·grikanio, MECDM-ni Chief Operations Officer Ronald Kynta aro Bakdil-ni Director Fr Cyril Sangma-ba dongpaaha.
Ia ECD Mission-ara, bi·sani janggi tanganio skanggipa bilsichetna simsak nirokani, an·seng baljokani aro chonaonin a·gilsakni seng·aniko on·na miksonge ra·gatgipa program ong·a aro ia kamo sorkari baksa bakrimanichi Bakdil dolba, songadam nokadamrango, mongsongbate giljarango, ia program-ko chu·sokgipa ong·atna kamrangko ka·anggen.
MoU-o soi ka·grikna gita tom·aniko ong·atanio a·dokni Chief Minister Conrad K Sangma, mongsonggipa sokgipa ong·e, ia program-ni gimin talataniko on·angengon, ian bi·sarangna, nokdangrangna, songsalna aro a·dokna, an·seng baljokaniko on·ani, dambemitingonin skie ra·ani aro naljokaniko on·anio a·dok sorkarini mongsongbatgipa aro chu·sokbatstanggipa kam ong·a ine parakataha.
Ia ECD Mission-ni mongsonggipa bakrangoni mingsade, a·dok gimiko donggipa dam 2000 Anganwadi centre-rangko Creche aro ECD centre-rangona dingtangatanian ong·enga aro bakan Anganwadi centre-rangko ramram nokrangoni nitobegipa aro mangkimgipa ECD centre ong·aniko nikna man·gen ineba Chief Minister aganaha.
Kamrangko ka·anio dingtang dingtang department aro songsalni gisepo bakrimna nangani gimin aganangengon, batanggimin somoirango department-rang, an·tangtangarisa kamrangko ka·ahani gimin ia ECD Mission-ara, Health, Social Welfare, Education department-rangko aro songsalni institute-rangkoba ku·cholsan ong·atna dakchakaha ine Chief Minister aganaha.
Re·anggipa bilsioba a·dok sorkari, ia ECD Mission-ni kamrangko chu·sokatanio, A·chik Baptist Dal·gipa Krima (ABDK) baksaba bakrime kamko ka·angaha aro ia program-ni ning·o, dingtang dingtang mondolirangni sak 200-na baten me·chik dilgiparangna ECD-ni gimin talatanirangko on·aha.
