SHILLONG: Meghalaya a·dokna rel garirangko nanggenchimoba, a·doko songdongenggipa manderang aro dingtang dingtang dolrang baksa chanchirimchengesa jekoba dakgen ine Mongolbar salo, a·dokni Deputy Chief Minister Prestone Tynsong, ku·rachakaniko on·angaha.
Iani bidingo kobor ra·timgipa manderang baksa agangrikengon, Meghalaya a·dokko rel ramarangchi nangdimatna gita India sorkari nangnikenga ine Union Railways Minister-ni agangipa kattarangara ong·akon aganaha ine Tynsong parakataha.
“Iako uamang an·tangtangni namgnina dakenga ong·ja indiba a·doko songdongenggipa manderangni namgninasa,” ine Tynsong aganaha.
Deputy Chief Minister-ni aganani gitade, iani bidingo adita salrangna skangsan pilak party-rangni committee-ko songaha aro maming ja·kurangko de·na skangba iani bidingo chanchirimna gita ua bakan dingtang dingtang dolrang baksa tom·aniko ong·atna miksongenga.
Meghalaya a·dokna rel garirangko nangchongmotenga ine janapatengon, “Anga an·tangde rel garirangko a·dokna nangnikenga indiba iako aganengon, an·ching pilakan iano bak ong·na nanggen. Anga aganaiani giminde ian ong·telgen ia katta ong·ja. Uni giminsa chinga chanchirimenba, pilak party-rangni tom·aniko ong·atna nangenga ine tik ka·aha aro dingtang dingtang dolrang baksa tom·anikoba Chief Minister ong·atanggen,” ine Tynsong aganaha.
A·doko bostu salani rel garirangko sorkari ra·bana jotton ka·genma ine sing·anina aganchakaniko on·angskaengon, “Uni giminan anga aganenga an·ching tom·e chanchirimchengna. An·ching dingtang dingtang dolrang baksa chanchirimchengesa mai neng·nikanirang donga uko ma·sina man·gen aro rel garirangko ra·bana nangama nangjawa ukoba chanchina man·gen,” ine Tynsong aganaha.
Meghalaya a·dokona rel garirangko ra·baengon, niam gri napsrukanirangko champengna gita bilakgipa niamrangko ra·gatna nanggen ineba ua aganaha.
“Chingaba sorkarini gita Inner Line Permit (ILP)-ko man·na krengenga aro Assembly-ona ianan resolution-ko pass ka·manaha. Indiba angni agangimin gita dingtang dingtang dolrang baksa tom·e chanchirimchengna nanggen,” ine Deputy Chief Minister parakataha.
Pilak party-rangni tom·anio VPP-ni bak ra·pajana tik ka·gipani giminde ua mamingkoba aganna gita jechakskaaha.
