SHILLONG: Ia sal somoirango so·sojengjeng ong·anirangchi salgro salaram a·dokrangna, mongsongbate Meghalaya a·dokna kenchakna nanganirang ong·engani gimin Mongolbar salo a·dokni Deputy Chief Minister Prestone Tynsong, Khasi aro Jaintia Hills a·jani Deputy Commissioner-rang, BSF Meghalaya-ni official-rang aro NBCC-ni official-rang baksa tom·aniko ong·atangenba, India aro Bangladesh a·songni gisepo sima kakugijagipa biaprangko ta·raken sima kachina ge·etaniko on·angaha.
Iani bidingo kobor ra·timgipa manderang baksa agangrikengon, “Anga da·alo deputy commissioner-rang baksa tom·enba, a·song damgnini gisepo sima kakugijagipa biaprangko ta·raken kapengna man·na gita a·a ra·ani kamrangko ta·rakatchina ge·etaniko on·angaha aro anga ka·donga chinga da·o adita antirangni gisepon, a·ana neng·nikanirangko namatna man·gen,” ine Tynsong aganaha.
“A·song damgnini gisepo sima kakugijagipa biaprango chinga ta·raken simarangko kana nangnikenga maina simarangko kaanichi, gipin biaprangoni napsrukbaenggipa manderangko BSF aro dingtang dingtang sipai dolrang, nambate nirokna man·gen,” ineba ua aganaha.
Deputy Chief Minister aro a·dokni Home Minister Prestone Tynsong-ni aganani gitade, a·arangko ra·anio neng·nikanirangko chagrongna nangengani a·selan West Jaintia Hills a·jao kilometer 33 ba 34-mang ong·gipa simarangko aro East Khasi Hills a·jaoba kilometer 7-8-mang ong·gipa Indo-Bangla simarangko kana man·kujaengachim.
“Ia sal somoirango a·songna aro mongsongbate Bangladesh a·songni sima jolrango donggipa salgro salaram a·dokrangna obostarang namjaengani gimin ia biaprangko ta·raken re·ange nipilchina aro ia kamko ta·rake matchotatchina anga East Jaintia Hills aro West Jaintia Hills a·jani Deputy Commissioner-rangna ge·etaniko on·aha,” ine ua aganaha.
Zero line-oni sima kachina dabienggipani bidingo janapatskaengon, iani bidingo a·dok sorkari, Home Affairs Ministry-na seatmanaha ine Tynsong parakataha.
Da·o dipet sima jolrango obostarangko name nirok sandina man·enga ine janapatengon, “India aro Bangladesh a·songni pilak simarangon dingtang dingtang sipai dolrang, bilaken nirok sandianirangko dakenga aro a·songni manderangko chel·chakna rakbee kamrangko ka·enga,” ine Deputy Chief Minister parakataha.
“Nangchongmotgipa lekkarang donggijade darangkoba Bangladesh-oni India-ona re·napbana on·jachina chinga ge·etaniko on·manaha,” ineba ua aganaha.
