TURA: Ia bilsini Secondary School Leaving Certificate (SSLC) porikkako pass ka·anggipa A·dokgre jolni pilak chatro chatrirangan, songtango poraipana cholko man·china ine A·dokgre Higher Secondary School-o morning aro evening shift-rangko kulian baksana classroom-rangko kulidape on·china A·chik Holistic Awakening Movement (AHAM) A·dokgre regional unit, a·dok sorkariko didiataha.
Iani bidingo AHAM A·dokgre regional unit, dingtangmancha a·dokni Chief Minister Conrad K Sangma-na chittiko sedoatenba, ia bilsini SSLC porikkao pass ka·anggipa A·dokgre jolni chatro chatrirang gimikanade biaprangko tikate on·na man·jaenga ine ia skulo morning aro evening shift-rangko kulie, classroom-rangkoba rikdape on·china mol·molataha.
AHAM A·dokgre regional unit-ni Chief Minister-na sedoatgipa chittio janapatani gitade, ia bilsini SSLC porikkako pass ka·gipa A·dokgre jolni sak 120 chatro chatrirang, A·dokgre HS School-ni Class XI-o admission-ko ra·na dorgastorangko galahachim indiba uamangoni sak 50-mangni gitasan admission-ko man·e, gipinrangde biap man·jae neng·nikanirangko chagrongna nangtokengachim.
“A·dokgre jolrango donggipa chatro chatrirang bang·batan cholgri ong·pagipa nokdangrangonisa ong·e, chel·a biaprangona re·ange poraina chol ong·tokjaenga, uni gimin ia chatro chatrirangna A·dokgre HS School-on admission-ko on·na man·na gita ia skulo morning aro evening shift-rangko kulie, classroom-rangkoba kulidape on·china chinga mol·molenga,” ine AHAM A·dokgre regional unit-ni president Marchborn R Marak, Chief Minister-na sedoatgipa chittio parakataha.