TURA: Bangladesh a·songoni niam gri India-ona napsrukbaanirang batroroengon, Mongolbar saloba, Bangladesh a·songoni sima gita India a·songona napsrukbaenggipa sakbri manderangko, Border Security Force (BSF) sipairang, South West Garo Hills a·jao rim·na man·aha.
BSF official-rangni u·iatani gitade, Bangladesh a·songoni niam gri napsrukbaenggipa manderangni bidingo Intelligence-ni u·iataniko man·soani ja·man 50 Battalion BSF-ni sipairang, a·song damgnini sima jolrango mikrake am·sandianirangko dakna a·bachengataha aro uandaken South West Garo Hills a·jani sima gita India a·songona re·napbaengmiting somoio ia mande sakbriko rim·na man·aha.
Rim·ako man·gipa manderangara, Bangladesh a·songni Mymensing, Gajipur aro Nogaon a·jarangoni ong·achim ineba BSF official-rang u·iataha.
Ja·mano rim·a man·gipa Bangladesh a·songni manderangko BSF sipairang, South West Garo Hills a·jani Mahendraganj police station-na pakwate on·ataha.
