Sakkirang dongode darangni dabiani grian NIA sandirokaigen ine VPP-ni dabianina sorkari aganchaka

SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) bobil dolna, gitcham Congress sorkarini somoio, da·o a·dokni Deputy Chief Minister ong·enggipa Sniawbhalang Dhar, tangka paisarangko dakchake on·achim ine a·kangenggipani bidingo National Investigating Agency (NIA)-chi sandirokchina Voice of the People’s Party (VPP) dabiengani gimin, iandake matnanganirangna sakkirang donga ong·ode darang party-rangni dabiani grian NIA, jakgitele sandirokaigen ine Budbar salo, MDA-II sorkari parakatskaaha.
“NIA-chi sandirokchina dabianio maming ong·gijanide dongja indiba uamang (NIA) sakkirang donggenchimosa iandakgipa kamrangni bidingo sandirokanirangko dakaigen aro indinaride an·tangtangni somoiko bon·ate rojawa. Sakkirang chu·onga gita donga ong·ode uamang darang political party-rangni dabiani grian ia case-ko jako ra·aigen,” ine a·dokni Cabinet Minister aro MDA-II sorkarina ku·wattimgipa Paul Lyngdoh parakataha.
HNLC bobil dolna, gitcham Congress sorkarini somoio, da·o a·dokni Deputy Chief Minister ong·enggipa Sniawbhalang Dhar, tangka paisarangko dakchake on·achim ine a·kangahani gimin iani bidingo NIA-chi jakgitele sandirokchina aro ian kakket ong·a ine nikgenchimode Dhar-ko Cabinet-oniko ra·galchina gita VPP dabiangahachim ine nikna man·a.
Deputy CM-ni kosako matnanganirangna aganchakaniko on·angengon, “HNLC-ni agangipa kattarangko nipiltaibo. Congress sorkarini somoio minister ong·engmitingo Deputy CM, bobil dolna dakchake on·aha aro iani bidingo uamang namen kobor man·a inesa aganaha. Da·o angade MDA-II sorkarina ku·wattimgipasa ong·e, Congress sorkarini somoio mai ong·a ukoba ma·sipaja maina anga an·tangde Congress-o ba HNLC-oba ong·pagipa ong·ja,” ine Lyngdoh aganaha.
“Congress sorkarini somoio ua (Dhar) an·tangni tangka paisarangoniko on·e dakchakaha inesa uamang changni chang aganahani gimin iakode na·simang uonikosa sing·sandie ra·bo. Haida iani bidingo MPCC-ni president Vincent Pala, talbate ma·siengnaba gnang,” ineba Lyngdoh aganaha.