TURA: Adita salrangna skang, Tura-o rikenggipa Tura Medical College-ko Chief Minister Conrad K Sangma-ni niangani ja·man, Chief Minister-ni agangipa kattarangko All India Trinamool Congress (AITC) raken jegalataha.
“Chief Minister-ni aganani gitade, ia project-ni kamrang da·o 80 percent matchotaha indiba ia medical college-ko mikkang bilsio chalaina aro kamrangko ia 2025 bilsini December jao matchotgen ine rongtalbregija agananiara manderangni gisepo jajaataniko ra·baani ong·enga. Ia sal somoirango sanna bananirangko ra·anio manderang bang·en koros ong·na nangan baksana chel·a biaprangonasa re·ange sanna bananirangko ra·na nangtokengon, uni (CM) iandake rongtalbregija agananiara manderangna suk ong·gijaniko ra·baanisa ong·aia. Kamrangko ka·anio iandake ru·utatchae dongna nangjaha,” ine AITC-ni dilgipa Richard Marak parakataha.
Garo Hills-o Tura Medical College-ko kulianiara namgipa sanna banani cholrangko ra·baani gitasan ong·aigija medical-ko poraina nangnikenggipa chadamberangnaba namgipa chol ong·engachim ine janapatengon, “Ian Meghalaya a·doko skanggipa sorkari medical college ong·na nangani ong·engani gimin kamrangko ja·manchake dongchana man·jawaha. Ia medical college-ni academic session-ko jedakeba 2026 bilsionide a·bachengtelna nanggnok. Somoirangko ra·dodaproroaniara manderangni sanna bananirangko ra·anio neng·nikanirangko ra·baani gitasa ong·enga,” ine Marak parakataha.
Ia Tura Medical College-ko chalaina gita private company-rang baksa agangrikenga ine Chief Minister-ni agananikoba AITC-ni dilgipa raken jegalataha aro ia medical college-ko private company-rangchi chalaina on·gija sorkari an·tangan chalaichina didiataha.
Ia medical college-ko sorkarichi chalaina gitasa manderangna ku·rachakaniko on·aha ine janapatengon, “Ia medical college aro hospital-ko private company-chisa chalaigenchimode poraienggipa chatro chatrirangna aro sanna bananirangko ra·enggipa manderangnaba korosrang bate neng·nikanirangko on·ani gita ong·gen,” ine Marak parakataha.