Umsawli-o rikenggipa gital Secretariat-ko 2027 bilsio matchotgen: CM

SHILLONG: New Shillong Township (NST)-ni Umsawli-o rikenggipa gital Secretariat-ko Bristibar salo, a·dokni Chief Minister Conrad K Sangma niangaha aro ia gital Secretariat-ko 2027 bilsini bijangchio matchotna nisan ka·enga ine parakataha.
Gital rikenggipa Secretariat-ko nieanio Chief Minister baksana planning aro urban affairs department-ni official-rangba dongpaaha aro ia gong kror 1188 project-ko rikanio somoi gita ong·angenga ine Chief Minister parakataha. Ia gital Secretariat-na pangchakaniko ia 2025 bilsini January 21 tariko songahachim.
“A·a cho·anirang aro pangchakaniko songani kamrang ta·raken matchotangenga aro kamrangko nike anga kusi ong·a. Ia gital Secretariat-ko 2027 bilsini bijangchio matchotna ka·dongenga aro kamrangko somoi gita matchotna ka·dongenga,” ine Sangma aganaha.
“Ia gital Secretariat-ko rikanian sorkarini kamrangko nambate ka·na pangchakaniko songani gita ong·gen aro ia building-na design-koba a·dokni daka rikani baksana gital chasongni bimang baksa meliate tariaha. Ia gital Secretariat-ko matchotna anga ka·oksibee nisengenga,” ineba ua aganaha.
Ia building-ko matchotahaode ia biapara administrative city-san ong·aigija Shillong songjinmao apchangket ong·aniko komiatna dakchakgnok ineba Chief Minister aganaha.
“Ian administrative city-san ong·aigija Shillong songjinmao apchangket ong·anikoba bang·en komiatgnok maina da·o ong·enggipa biaponi administration-ko apjitbaahaode biaprang bang·en bangbang ong·gnok aro gari gorarangni re·ruraaniba rama dingtanggnok,” ine ua aganaha.
New Shillong Township ning·o tarienggipa bang·bata ramarangkon matchotaha aro gipinrangkoba tariengkua ine janapatengon, ia biapo tarienggipa ramarangara ia jolrango mingsinggipa biaprangkoba nangategen aro ian Shillong songjinmao re·a doanikoba pilakni gitan nambatatgen ine Chief Minister aganaha.
“Apsan somoion chinga New Shillong aro gital Secretariat-ona dingtang dingtang ramarangkoba tarienga aro mitam ramarangkode matchotahani gimin Shillong songjinmaoni ia administrative city-ona re·a doani cholrang nambatgnok,” ine Sangma aganaha.
“Da·alo chinga kamrangko chu·gimik nipilangaha aro kamrang ta·rakengani gimin chinga chu·ongnikaniko man·aha. Kamrang somoi gitan matchotna ka·dongenga,” ine Chief Minister parakataha.