SHILLONG: Meghalaya a·doko drugs ba pekatgipa sam jakkalaniko warachakanio sak 100-na baten skigiparangko ‘counsellor’ ba agan-ku·pattie on·gipa dake jakkalna training-ko on·gen ine Sukrobar salo, a·dokni Social Welfare Minister Paul Lyngdoh parakataha.
Iani bidingo kobor ra·timgiparangna talataniko on·angengon, a·doko drugs jakkalaniko aro badingsrukaniko bon·atna sorkari, Social Welfare department-ni ning·o rakbee kamrangko ka·enga ine Lyngdoh aganaha.
“Drugs jakkalani aro badingsrukaniko bon·atna gita chinga dingtang dingtang cholrang ra·gataha aro ia somoirango an·ching biterangkoba nikna man·engaha. Angni skang agangimin gita da·o sam jakkalgiparang 20 percent-ni gita komiangaha indiba an·ching iako chu·ongnike dongna man·kujawa,” ine ua aganaha.
Drugs jakkalaniko bon·atna gita uni department, rakbate kamrangko ka·angkuenga ine janapatengon, “Skanggipao an·chingni chadamberangko drugs-rangchi salako man·jana gita kamko ka·na nangenga aro iana DREAM program-ni ning·o Neurology & Mental Health-ni Sanker Centre baksa bakrime, chadamberangna agan-ku·pattie on·na gita skigiparangna training-ko on·gen. Ian class II-oni class V-ona poraienggipa bi·sarangna agan-ku·pattie on·ani ong·gen aro iano skigiparang, chadamberangko, pekatgipa samrangoni chel·e dongna gita agan-ku·pattianirangko on·gen,” ine a·dokni Social Welfare Minister aganaha.
Skigiparangna training-ko on·ani bidingo talatangengon, skigipa sak 10-na jasani training-ko on·gen aro uandaken ja 10-ni gisepon sak 100 skigiparangna training-ko on·na man·gen ine Lyngdoh parakataha.
“Ian counsellor dake kamko ka·enggipa skigiparangna ong·gen aro iana sorkari, course fee-ni 50 percent-ko, chong·motan gong 10,000-ko on·gen. Bi·sarangko biap damsanode rimchimonge agan-ku·pattie on·na man·jawa, uni gimin skigiparang, skultangtangon counsellor dake kamko ka·na man·na gita skigiparangna training-ko on·gen,” ine ua aganaha.
Drugs jakkalaniko warachakanio Shillong Lajong Club-ba Social Welfare department baksa bakrimaha aro chadamberangna agan-ku·pattie on·anio bakrime kamrangko ka·anggen ineba Lyngdoh parakataha.