SHILLONG: Meghalaya a·doko, mongsongbate Khasi-Jaintia Hills jolrangona rel garirangko ra·baani bidingo cholrangko nina gita pilak political dolrangni committee-ko songna manchianio Opposition dolrangoni Voice of the People’s Party (VPP) aro Congress dolrang bak ong·pana tik ka·ahani gimin a·dok sorkari, suk ong·gijaniko parakataha.
Rel garirangko ra·baani bidingo apsan tom·e chanchirimna aro cholrangko nina gita pilak political dolrangni committee-o bak ra·pajawa ine parakatahani gimin suk ong·gijaniko parakatengon, “Rel garirangko ra·baani bidingo ku·cholsan ong·e chanchirimenba, dingtang dingtang dolrangni nangnikani aro chanchianiko ra·nasa ia tom·aniko ong·atna manchiengachim indiba maiko chanchie uamang, ia tom·anio bak ra·jana tik ka·aha anga an·tangde ma·sijaha,” ine a·dokni Cabinet Minister aro MDA-II-na ku·wattimgipa Paul Lyngdoh aganaha.
Dingtang dingtang political dolrang apsan tom·e chanchirimgenchimosa rel garirangko ra·baani namgni, namgijani aro pilakni chanchianikoba ma·sina man·genchim ine janapatengon, “Uamang (Opposition dolrang) indake aganchakaia ong·ode sorkarini kamrang maming saloba chu·sokgipa ong·na man·chipjawa aro skango gitan apsan daken dongaigen,” ine Lyngdoh aganaha.
Meghalaya a·dokni dingtang dingtang biaprangona rel ramarangko taribaani bidingo chanchirimna gita pilak political dolrangni tom·aniko ong·atanio Congress dol bak ra·jawa ine Bristibar salosan MPCC-ni secretary Manuel Badwar parakatahachim.
Rel project-rangni bidingo political dolrangni tom·e chanchirimanio bak ra·pajana tik ka·aniko parakatengon, sorkarini iandake rel project-na committee-ko songaniara, iandakgipa kamrango pilak dolrangkon bak ong·atenga ine sorkarini dakmesokanisan ong·aia maina je kamrangon uamang an·tangari chanchina man·ja uandakgipa kamrangnade sorkari, gipinrangkosa matnangrongskaaia ine Badwar aganahachim.
Badwar-ni aganani gitade, a·dokna nangchongmotgipa bang·a kamrangon sorkari, iandake pilak party-rangni committee-rangko songronggija an·tangtangsa jekoba ja·ku de·rongaiachim.
Rel project-ni bidingo chanchirimna pilak party-rangni committee-ko songna tik ka·engani gimin sing·doatengon, “Joa kal·chakgipa casino-rangni gimin chanchianio uamang pilak party-rangni committee-ko songachimma? Dongja. Simarango ong·enggipa golmalrangko namatna kam ka·anio uamang pilak party-rangni committee-ko songachimma? Dongja. Indide da·o rel project-ni gimin chanchianiora maini gimin pilak party-rangni committee-ko songna nangenga?” ine MPCC-ni secretary sing·doataha.
Iana skang, Opposition dolrangoni Voice of the People’s Party (VPP)-ba pilak political dolrangni tom·anio bak ra·pajana tik ka·angahachim.
