TURA: Garo Hills-ni bang·a songrangon Jal Jeevan Mission (JJM)-ni kamrang matchotja aro je biaprangon kamrang matchotahachim, ua biaprangoba chirangko man·jaenga ine badi ka·anirangko man·ahani gimin Sukrobar salo, a·dokni PHE Minister Marcuise N Marak, West Garo Hills a·jani mitam songrangona re·angenba, JJM-ni kamrangko niangaha.
Koborko on·ani gitade, a·dokni PHE Minister, Karonggre, Tibhapara, Kujikura aro Koinabhoi Adinggre songrangona re·ange, JJM-ni kamrangko niangaha.
“A·dokni dingtang dingtang biaprango, mongsongbate songadam nokadamrango sorkarini kamrangko chu·sokgipa ong·ama ong·jaenga uko ma·sina gitade biapona re·e niachisa nambate ma·sina man·a aro ia songrangona re·ange nianichi baditana kingking kamrang chu·sokgipa ong·enga aro mai dakgipa neng·nikanirangko chagrongna nangenga, uko ma·sie ra·na man·aha. Ia songrangona re·anganio anga songni manderang baksa agangrike, uamangni neng·nikanirangkoba ma·sie ra·bana man·aha,” ine Marak parakataha.
