SGH-ni Mekalpagre songo gital skul nok, bijoliko on·china NADC dabia

TURA: South Garo Hills a·jao Mekalpagre songara diltubatsranggipa songrangoni damsa ong·e, lekka porako on·anio, bijoliko on·anio, mobile network-ko on·anio, sanna bananirangko on·anio aro rama jal·langrangba dongjae songni manderang neng·nikanirangko chagrongna nangtokenga ine Nokrek Area Development Committee (NADC) parakatenba, ia songna skul nok aro bijoliko on·china a·dok sorkariko didiataha.
NADC-ni secretary Chegan N Marak-ni parakatani gitade, Mekalpagre songo Non-Government Lower Primary skul damsamangmang donga, jeon Nursery-oni Class V-ona lekka porako on·enga indiba ia skulo chu·onga gita skul nokrang dongjae, skulo poraienggipa bi·sarang neng·nikanirangko chagrongna nangtokenga.
Iani bidingo a·dokni Education Minister Rakkam A Sangma-na sedoatengon, “Ia skulo sak 30-na baten chatro chatrirang poraienga indiba ia skulo classroom-rang dongjae, chonbegipa babilsiosa class-rangko ra·na nange, chatro chatrirang aro skigiparang dolgnian neng·nikanirangko chagrongna nangtokenga,” ine NADC-ni secretary parakatenba, ia skulna nokrangko rikdape on·china didiataha.
Ia skulo skigipa saksansa Nursery-oni class V-ona skie on·na nangenga ine janapatskaengon, ia skulna skigiparangkoba chu·onga gita on·dapchina NADC-ni secretary, a·dokni Education Minister-ko didiataha.
Mekalpagre songna ta·raken bijoliko sale on·china gitaba NADC, a·dokni Power Minister AT Mondal-na dingtang sedoataha.
Power Minister-na sedoatgipa chittio NADC-ni parakatani gitade, Meghalaya a·dokko man·chengaoni bilsi 50 batpilengahaoba ia songo bijoliko man·kujaengani a·selan songni manderang, mombati aro kerosene-rangosa pangchake janggi tangna nangtokkuenga.
“Ia songara Chokpot constituency-ni ning·o diltubatsranggipa songrangoni damsa ong·a aro ia songko da·alonan politician-rang aro sorkari officer-rang galchipkuenga. Ia songo bijoli dongjani a·selan songni manderang, mongsongbate chatro chatrirang, neng·nikanirangko chagrongna nangtokenga,” ine NADC-ni secretary parakatenba, ia songna ta·raken bijoliko sale on·china a·dokni Power Minister-ko didiataha.
South Garo Hills a·jani Durama Wagegitok RMSA Secondary skulna Mathematics, Science aro English skigiparangko on·china gitaba NADC, a·dokni Education Minister Rakkam A Sangma-ko mol·molataha.
“Rongdi Anchenggre songni Durama Wagegitok RMSA Secondary skulko 2019 bilsio kuliaha aro ia skulni Class IX aro Class X-o sak 18-na baten chatro chatrirang poraienga. Indake ong·genchimoba batanggimin bilsi bongana ia skulko Mathematics, Science aro English skigiparang grisa chalaiengani a·sel SSLC porikkako seenggipa chatro chatrirang, an·tangtangsa poraina nange neng·nikanirangko chagrongna nangtokenga,” ine NADC-ni secretary Chegan N Marak parakatenba, ia skulna ta·raken Math, Science aro English skigiparangko on·china Education Minister-ko mol·molataha.