New Delhi: (IANS) India aro Pakistan a·songrangni gisepgriko chu·gimik aro ta·rake chandalmittugrikaniko US President Donald Trump-ni parakatani adita minit-ni ja·man Ministry of External Affairs aganaha, dolgnini gisepgriko slai go·grikanniko aro military-rangni a·pagita, bangbang gita aro sagal gita ja·ku de·aniko Sonibar salo India-ni somoi attam 5 bajioni dondipatgen.
“Sonibar saljatchio Pakistan Military Operation-ni Director General India-ni Military Operation-ni Director General-na 3 ata bajio call ka·ataha. Sonibar salni konta 5 bajioni a·pagita, bangbang gita aro sagal gita military ja·ku de·aniko aro slai go·grikaniko dondipatna uamangni gisepgriko namnikgrika,” ine Foreign Secretary Vikram Misri kan·dike kobor ra·timgiparangna aganaha.
“Ia ma·sichakgrikanikna dolgnini gisepgriko ge·etanirangko on·aha. May 12 tariko Military Operation-ni Director General changsatai agangrikgen,” Foreign Secretary agandapangaha.
Agangrikaniko ba chandalmittugrikani maming talatani kattarangko gipinrang baksa agananga grian India aro Pakistan-ni gisepgriko ta·rake chu·gimik chandalmittugrikaniko US President Donald Trump parakataha.
State Department-ni agananio jeon ua aro Vice President J.D Vance chandalmittugrikanina agangrikaniko dakaha ine US Secretary of State Rubio aganaha.
“United State-ni gita walo bakroe agangrikani ja·man, India aro Pakistan chu·gimik ta·rake chandalmittugrikna namnikako parakatna anga bilongen kusi ong·a,” ine social media-o President Trump seataha.
“Gisik sengani aro u·ianiko jakkalanio a·song damgnina nama skaniko on·a. Iani bidingo na·simangni gisiko nanganina mittela,” ine ua agandapangaha.
“Batanggimin konta 48-o Vice-President Vance aro anga India-ni aro Pakistan-ni a·gipi official-rang baksa agangrikaha, ia agangrikanio Prime Ministers Narendra Modi aro Shehbaz Sharif, External Affairs Minister Subrahmanyam Jaishankar, Chief of Army Staff Asim Munir, aro National Security Advisors Ajit Doval aro Asim Malik dongchapaha, ine Secretary of State Rubio aganaha.
“Ta·rake chandalmittugrikaniko dakna India aro Pakistan sorkarirangni namnikgrikaniko anga parakatna kusi ong·bea aro bijangchio donge mamlarangko namgrikatna agangrikaniko a·bachengataha. Uamangni u·ianina, aro tom·tomani ramako baseanganina Prime Minister-rang Modi ar Sharif-ko chinga ku·pattia,” ine ua aganaha.
