Meghalaya-ni student-rangna a·dokon CUET sena on·china sorkari mol·mola

SHILLONG: Meghalaya a·dokni chadamberangna CUET (UG) 2025 examination ba porikkana centre-ko a·dokon on·china sorkari, National Testing Agency (NTA)-ni Director General-ko mol·molataha.
Education-ni Secretary Swapnil Tembe, NTA-na seatgipa chittio, Meghalaya-oni student-rang jemangan Shillong-o CUET-ko sena gapatahachim, uamang Assam, Tripura aro gipin a·dokrangosa centre-ko man·ahani gimin badi ka·aha ine janapataha.
Porikkana skangmangmang exam centre-ko tikatanio student-rang neng·nikarangko chagronga. Uni gimin Meghalaya-ni chadamberangna a·dokni ning·on centre-ko on·pachina NTA exam-na dongipa State Nodal Officer Tembe, mol·molataha.
Minggipin March 11-o man·gipa notification-ni ja·man gimik NTA-ni porikkarangko nirokna state-level Committee-ko songaha. District-rangkoba batanggimin March 20 tariko district-level committee-ko songchina ge·etaha.
Gimik district-rangna committee-ko songe NTA-ni porikka seaniko nirokenga. A·dokni dingtang dingtang bakrango dongipa centre-rango NEET (UG) exam-koba namen ong·ataha. Meghalaya a·dok a·briragipa baip ong·a, uni gimin student-rangna chel·e songrena bilongen koros ong·a, ine Tembe aganaha.
Admission guidelines
NEHU Controller of Examination, Sumarbin Umdor, NEHU baksa nangdimgipa college-rango admission ra·anio round gni niam donga.
Skanggipa round-o CUET (UG) 2025 porikkani score ba marks-ko nigen. Gnigipa round-o University Grants Commission (UGC)-ni on·gipa standard operating procudure-ko ja·rikgen.
Education Ministry-ni agangiminko janaptaie Dr Umdor, indine aganaha, gimik Central university-rango aro bakrimgipa college-rango undergraduate (UG) aro postgraduate (PG) program-rango admission ra·na Common University Entrance Test (CUET)-ni marks-ko nangtelgen.
“Indiba, bilsi 2023-o UGC-ni on·gipa SOP-o CUET porikkako segijagipa candidate-rang, CUET segipa gimik candidate-rangni admission ra·a ja·man rasong gnange seat gitchaa dongode cholko man·gen ine aganaha.