TURA: India aro Pakistan a·songni gisepo so·sojengjeng ong·enggipani bidingo adita salrangna skang A·chik chadambe saksani a·songtangko chonnike, Pakistan a·songna chakpaaniko social media-o parakatani ja·man, iani bidingo A·chik jat gimiko man·gope, ku·wattogija kattarangchi social media-o post ka·skaahani gimin mande saksani kosako A·chik State People’s Front (ASPF) Garobadha regional unit, Garobadha OGC-ni officer-in-charge-na FIR ka·doangaha.
ASPF Garobadha regional unit-ni FIR ka·anio parakatani gitade, ia mandeara Gandhipara songoni saksa Seyamal Koch minggipa mande ong·achim aro ua A·chik jat gimikko man·gope ku·wattogija kattarangchi saienba Sonibar salo, Facebook social media-o post ka·ahachim.
“Ian Silgring Sangma minggipa chadambeni video-na aganchake post ka·gipa ong·a indiba uni aganchakanio ua (Seyamal) A·chik jatni bimingko ra·esa ku·wattogija kattarangchi post ka·aha. Ian Garo Hills-o dingtang dingtang jatrangni tom·tome aro meli nangrime songdonganiko golmal ka·ani gita ong·a,” ine ASPF Garobadha regional unit-ni president Sanjhu T Sangma parakataha.
Ia mandeni kosako Bharatiya Nyaya Sanhita (BNS) 2023-ni Section 356, Section 196, Section 352 aro Section 353-ni ning·o mokordoma ka·china aro uni dosni kri uko rim·e nanga gita sastirangko on·china gitaba ASPF Garobadha regional unit, FIR-o didiataha.
