SHILLONG: Common University Entrance Test (CUET-UG) 2025-ni mitam porikkako May-ni 13 tarikon a·bachengengahaoba, a·dokni mitam chatro chatrirangnade chel·a biaprangosa centre-rangko tikatahani a·sel chatro chatrirang neng·nikanirangko chagrongna nangtokengani gimin CUET porikkako ra·dochina gita a·dok sorkari, National Testing Agency (NTA)-ko mol·mole sedoataha.
Iani bidingo talataniko on·angengon, re·anggipa bilsio gitan ia changoba a·dokni mitam chatro chatrirangna chel·gipa biaprangosa centre-rangko tikatahani a·sel chatro chatrirang neng·nikanirangko chagrongna nangtokenga, uni gimin chatro chatrirangni namgnina CUET porikkako ra·dochina NTA-na sedoataha ine Sombar salo, a·dokni Education Minister Rakkam A Sangma parakataha.
“Re·anggipa bilsioba ia apsan neng·nikanirangkon chagrongna nangaha. Somoi gita NTA, chingna u·iatsamsoa ong·ode chinga nangani kri tarisamsona man·genchim indiba bakkandikbegipa somoio mitam chatro chatrirangna chel·gipa biaprangosa centre-rangko sualahani gimin chatro chatrirang, mongsongbate cholgri ong·gipa chatro chatrirang neng·nikanirangko chagrongna nangtokenga,” ine Sangma aganaha.
Education Minister-ni aganani gitade, Meghalaya a·doko, mongsongbate Shillong songjinmao CUET-ko sena dorgasto galgipa chatro chatrirangoni mitamrangde Jorhat, Mizoram, Nagaland, Kolkata aro Andaman & Nicobar Island gita dakgipa biaprangosa centre-rangko man·aha aro mitam porikkakode May 13 tarikon a·bachengengahani gimin chatro chatrirang, bang·en tangka paisarangko koros ka·e tikatgimin biaprangona re·angna nangtokenga aro mitamrangde porikkakon sesrangjaengaha.
Iandake chel·a biaprango CUET-ko sena nangenggipa chatro chatrirangni namgnina CUET porikkako ra·doatchina a·dok sorkari, NTA-na sedoataha aro iandake nangchakeako man·enggipa chatro chatrirangko dakchakna gita departmental helpline-koba kuliaha ine Sangma parakataha.
Meghalaya a·dokni chatro chatrirang, Common University Entrance Test (CUET)-ko gipin a·dokrangosa sena nange neng·nikanirangko chagrongna nangtokengani gimin, a·dokni chatro chatrirangna a·doktangon CUET centre-rangko on·na gita National Testing Agency (NTA)-na ge·etaniko on·china a·dokni Chief Minister Conrad K Sangma-ba, Union Education Minister Dharmendra Pradhan-ko mol·molangahachim.
Indake ong·engon, batanggimin changrango ku·rachakaniko on·ani ja·manba CUET porikkani bidingo a·dok sorkarirangna u·iatsamsogija porikka ong·na gitikosa chatro chatrirangna u·iattaiahani gimin a·dokni Education Minister, NTA-ko matnangataha.
A·doko CUET porikkako sena tarisoanirangko talate on·angskaengon, “Chinga computer centre-rangko sandidape tarisamsoaha aro NTE-ni official-rang, ia biaprangko nina Mongolbar aro Budbar salrango sokbaengaha. Ia antio CUET porikkako sena nangenggipa chatro chatrirangna, biaprangko tikate on·na chinga ka·dongenga,” ine Sangma aganaha.
State University-o bak ong·enggipa college-rangde CUET-ko sena nangjani giminsa bang·bata college-rangkon a·dokni State University-o bak ong·atna jotton ka·enga ineba Education Minister aganaha.