WILLIAMNAGAR: East Garo Hills a·jani Samanda C&RD Block ning·o donggipa Karubibra songo, MPLAD scheme-ni ning·o skang tarigipa metre 51.5 ong·gipa ramani bidingo songni manderang, BDO aro East Garo Hills a·jani Deputy Commissioner-na badi ka·doangaha.
Ia ramara Karubibra-oni Nengmandalgre-ona gari re·na man·e tarigipa kutcha rama ong·a aro ia ramako gong lak 2 koros ong·e tariahachim.
Ia ramako tarina skang songni manderangna u·iatchengjahani a·sel, manderangni re·na jakkalgipa rama gitade ia project-ko tarijaha indiba manderangni re·ronggijagipa rama gitasa tariskaaha ine songni manderang badi ka·doangaha.
“Ia ramako gari re·na man·e tarigen ine chinga ma·sijachim indiba jensalo sign board-ko songaha, unosa chinga ia project-ni gimin tale ma·sina man·aha. Ia ramako tariani bidingo am·sandie nion, ia ramako Samanda C&RD Block-ni Junior Engineer Enok Marak-ni nirokanio, contractor Dimchangchirim K Sangma tariaha ine chinga ma·sina man·aha,” ine songni manderang parakataha.
Iani bidingo songni manderang dingtangmancha Nokmani noko tom·aniko ong·ataha aro ia tom·aniona contractor aro JE-koba okamataha ineba songni manderang parakataha.
“Ia tarigipa ramakode songni manderang jakkalrongjani gimin manderangni jakkalronggipa Karubibra-oni main road-ona ramako tariskachina chinga aganaha maina je rama gitan da·o gari gorarang re·ruraengachim, ia ramani obosta namsrangjaha,” ine songni manderang parakataha.
Jolo songdongenggipa manderangni parakatani gitade, ia tom·anio contractor aro JE sakgnian, ramako 2024 bilsini November jao tarina a·bachenggen ine ku·rachakaniko on·ahachim indiba da·alonan kamrangko a·bachengkujaenga.
“Skang tarigipa ramade maming namgnian dongjaengani gimin kamko a·bachengna skang songni manderango sing·cheng sanchengna nangachim. Ia project-ara indin ong·gramaiaha aro chinga iako songni manderangna namgni ong·atna nangnikengani giminsa manderangni jakkalronggipa ramako tarichina aganengachim,” ine songni Nokma Swellesh Sangma parakataha.