SHILLONG: Mongolbar salo, Meghalaya a·dok gimiko donggipa dingtang dingtang Self Help Group (SHG)-rangoni sak 30 me·chik membor-rang, Meghalaya State Rural Livelihoods Society (MSRLS)-ni official-rang baksa a·songni Vice President Jagdeep Dhankar-ko, New Delhi-o grongeaha. Ia SHG membor-rangko a·dokni Chief Minister Conrad K Sangma dilangaha.
SHG membor-rangni Vice President-ko grongeanio a·dokni Chief Minister baksa dongpagipa MSRLS-ni official-rangara, C&RD-ni Additional Secretary aro MSRLS-ni CEO Ramakrishna Chitturi, MSRLS-ni Chief Operating Officer Ronald Kynta, Cluster Level Federation (CLF)-ni Project Manager Heman Hillary Engleng Masharing aro West Garo Hills MSRLS-ni District Mission Manager Michelle Ch Momin ong·a.
Meghalaya a·dokni SHG membor-rangko gronge agangrikengon, a·doko Chief Minister Conrad K Sangma-ni dilanichi, me·chikrangko mangrakbatatna aro a·dokko chalaianio me·chikrangni changa sapanirangkoba jakkalengani gimin a·songni Vice President mittelpilangaha.
Meghalaya a·doko me·chikrangko mangrakbatatani, an·seng baljokaniko on·ani aro ma·giparangna simsak nirokanirangko on·aniara me·chikrangni dilanichi dal·roroaniko mesokani ong·a ineba Vice President Dhankar aganaha.
New Delhi-ona re·anganio ia sak 30 SHG membor-rang, Prime Minister-ni Museum-koba nianggen.
Batanggimin bilsi 10-ni gisepo, songadam nokadamrango SHG-rangko bikotanichi aro dingtang dingtang kamrangchi me·chikrangni bak ra·aniba namen tang·doangaha maina 2015 bilsio dol 5000 SHG-mangsan dongaiachim indiba da·o dol 52,000 SHG-rang kamrangko ka·engaha. SHG Mission-ni ning·o da·o lak 5.2 me·chikrangko man·chapengaha.
Mongolbar salo a·songni Vice President-ko grongegipa dingtang dingtang SHG-ni membor-rangara, Agnesh Momin – East Garo Hills, Zerina R Sangma – East Garo Hills, Gonitha R Marak – East Garo Hills, Tangchi Sangma – North Garo Hills, Sonabal Sangma – North Garo Hills, Tinamuni R Marak – North Garo Hills, Cheryan Topsy R Sangma – North Garo Hills, Balse R Marak – North Garo Hills, Bethsidha D. Sangma – North Garo Hills, Amritha Marak – South Garo Hills, Novina Ch. Sangma – South Garo Hills, Lahun Mary Blah – West Khasi Hills, Letizia Lyngdoh Mawphlang – East Khasi Hills, Joycy Mary Wankhar – East Khasi Hills, Pdianghun L. Nonglait – Eastern West Khasi Hills, Behappy L Nonglait – Eastern West Khasi Hills, Lucia Wahlang – Eastern West Khasi Hills, Carolyne Ryntathiang – Ri Bhoi, Regina Dkhar – West Jaintia Hills, Mardorlyne Pariong – West Khasi Hills, Markordor Nongrem – West Khasi Hills, Arjulish Ch. Sangma – South Garo Hills, Aitilin Marbaniang – Ri Bhoi, Josephine Lyngdoh – Ri Bhoi, Mary Ann Diengdoh – Ri Bhoi, Santi Shylla – East Jaintia Hills, Merry June Ymbon – East Jaintia Hills, Baiasngewlem Lamare – West Jaintia Hills, Waiting Syrti – West Jaintia Hills, aro Pynshnalad Suting – East Khasi Hills ong·a.
