TURA: South Garo Hills a·jani Chokpot Sub-Division-ni ning·o donggipa Dana Adugre songo Nokrek Adhoc Upper Primary skulko batanggimin bilsi 10 batpile nosto ong·gimin skul nokosa chalaienga ine Nokrek Area Development Committee (NADC) parakatenba, ia skulo poraienggipa bi·sarang aro skigiparangni namgnina ia skul nokko ta·raken tarie on·china, South Garo Hills a·jani Deputy Commissioner-ko didiataha.
NADC-ni joint secretary Salseng N Marak-ni u·iatani gitade, Dana Adugre songo UP skul damsamangmangsan dongaia aro ia skulo class 6-oni class 8-ona lekka porako on·paengachim. Indake ong·genchimoba ia skul nokni obosta namsrangjahani a·sel skulo poraienggipa bi·sarang aro skigiparangba neng·nikanirangko chagrongna nangtokenga ine NADC parakataha.
“Ia skul noko nokking aro kelkirangba nosto ong·ahani a·sel da·o gita mikkarang waani somoirangode skigiparang aro skulo poraienggipa bi·sarang namen neng·nikanirangko chagrongna nangtokenga. Ia skul noko kelki aro do·garangba dongja aro classroom-ko kapenggipaba ramram tin-chisa kapengani a·sel nosto ong·tokaha. Ia skulko bilsi 10 batpile maming taridape on·ani grisa chalaiengani a·selan skulo poraienggipa bi·sarang aro skigiparangba neng·nikanirangko chagrongna nangtokenga,” ine NADC-ni joint secretary parakataha.
Ia skulo babilsiba dongjani a·selan skulo poraienggipa bi·sarangna Mid-Day Meal-ko on·anio skigiparang aro dakchake on·enggipa manderang neng·nikanirangko chagrongna nangtokenga ineba NADC parakataha.
“Uni gimin ia skulo poraienggipa bi·sarang aro an·tangtangko on·kange a·gilsakni seng·aniko on·enggipa manderangni namgnina ia skul nokko ta·raken tarie on·china chinga mol·molenga,” ine NADC-ni joint secretary, South Garo Hills a·jani Deputy Commissioner-na sedoatgipa chittio janapataha.
