SHILLONG: Tura-ko Winter Capital songchina dabiani ja·man Jowai-koba Summer Capital songskachina Jaintia Students Union (JSU) dabiskaengani gimin Tura-ko Winter Capital songchina dabianiara Jaintiarangni namroro silroroanina dabianirangko ra·sekenga ong·ja aro pilakan an·tangtangni namgnina dabina gita bilrang dongaia ine A·chik Holistic Awakening Movement (AHAM) parakataha.
Tura-ko Winter Capital songchina dabiani ja·man Jowai-ko Summer Capital songskachina JSU-ni dabienggipana aganchakaniko on·angengon, jat ge·antian an·tangtangni neng·nikani aro nangnikanirangko ku·rang on·na bil donga indiba iandake jatni namgnina dabianio miksonganiba gamchatgipa ong·a ine AHAM-ni president George Prince Ch Momin parakataha.
“Meghalaya a·dokde jakgitelgipa a·doksa ong·a, badiaba dolrangchi sason ka·gipa a·dok ong·jani gimin Khasi, Jaintia ba Garo pilakan jatni namroro silroroanina aro namgnina ku·rang on·na gita bilrang donga. Indake ong·genchimoba, iandakgipa dabianirangara gipin jatrangni dabianina dabie mesokskaanide ong·na nangja indiba ma·sichakgrikgipaonisa ong·na nanga,” ine Momin parakataha.
Tura-ko Winter Capital songchina dabianiara rang·gitik ba da·osa dabienga ia katta ong·ja ine talataniko on·angengon, a·dokko man·chengonin Garo Hills-ni manderang galchipako man·engani gimin aro aro sorkarini kamrango mikkang niteaniko man·engani gimin ian chengonin dabianisa ong·a ine AHAM parakataha.
“Garo Hills-ni manderang, sorkarini gadango maiba kamrangko chu·sokatna nangon baditaba kilometer ong·gipa ramako re·angesa Shillong-ona sokangna man·enga. Tura-ko Winter Capital songaniara mikkang nitee songani ong·jawa indiba ian sorkarini kamrangko apsan ong·e sualani gitasa ong·aigen,” ine Momin parakataha.
Shillong-oni Jaintia Hills-ona chel·grikani gimin janapatskaengon, Jaintia Hills-ni district headquarter damgni, chong·motan Jowai aro Khliehriat-ona Shillong-oni kontagni ba kontagni atamangsan nangaiani gimin ian pilak kamrangon re·a doanio altubataia ine AHAM parakataha.
“Iandake skotong songjinmaoni sepangaiani gimin Jaintia Hills-de dingtang dingtang kamrango namgnirangko man·battelaia indiba Garo Hills-ni manderangde, Shillong-ona songreanio salgimik gitan nangaiani a·sel koros aro somoirangko bang·en galna nangronga. Uni gimin anga angni Jaintia jong-ada, no-abirangko, chingni nama kamna krenganio bakrimaniko on·china mol·molenga,” ine AHAM-ni president George Prince Ch Momin parakataha.
