SHILLONG: Bristibar salo, Shillong songjinmani Mawdiangdiang-o donggipa IT Park-o US a·songni Technology Solutions company SIROBILT Software Services Pvt Ltd-ni gital office-ko a·dokni Chief Minister Conrad K Sangma-ni jakchi kulie on·angaha.
Shillong-ni IT Park-o gital office-ko kulie on·anganio a·dokni Chief Minister, jinmana aganprakengon, “A·doko SIROBILT-ni donganiara an·chingni IT eco-system-na ja·ku de·ani gita ong·aha aro ia company, sak 300 software professional-rangko kamo rakkianichi an·chingni chadamberangna gamchatbegipa cholrangko oe on·an baksana tech sector-o kamrangko nakatatani gitaba ong·aha,” ine aganaha.
Chief Minister-ni aganani gitade, Shillong Tech Park-o kamrangko ka·enggipa company-rangoni ia SIROBILT company-an bongagipa ong·enga aro ia company-ni gital office-ko kulianiara IT Park-ni skanggipa phase-o biap gapaniba ong·aha.
“Iandake a·gilsak gimikni aro a·songni IT player-rang, Meghalaya-ko technology business-o tang·doatna dakchakenga. A·doko kam ka·giparang chu·onga gitan donga aro a·dok sorkari, chadamberangna cholrangko oe on·na gita IT-ni kamrango nanga gita dakchakanirangko on·enga,” ineba ua aganaha.
Shillong Tech Park (Phase-II)-ko dal·batatanichi, bang·bata IT company-rangko aro dingtang dingtang company-rangko a·dokona salbana dakchakgen ine janapatengon, IT sector-o invest ka·na sienggipa manderangna aro company-rangna sorkari dakchakanirangko on·enga ine Chief Minister parakataha.
