TURA: Bristibar sal May jani 15 tariko Tura songjinmao, Tobacco Free Educational Institutions (TOFEI) Day, ba skul aro college-rangni sambajolo ta·makku jakkalaniko chel·atna gita Tura Christian College aro Tura United Christian Academy (TUCA)-o skie ra·enggipa chatro chatrirang bakrimenba rally-ko ong·atangaha.
Ia rally-ko songsalo chadamberangni ta·makku jakkale rokomari sabisi man·aoni naljoke dongna man·na gita aro skie ra·chakram biaprango iandakgipa sabisiko ra·bagipa bosturangoni chel·e dongna gita ong·atangaha.
Ia rally-ko ong·atanichi Cigarettes and Other Tobacco Products Act (COTPA)-o pangchake ra·gatgimin niam gita skie ra·chakram ning·o ba a·palo ia ta·makku jakkalaniko ba mikrakata. Una agreba ia program-ko ong·atachi ta·makku jakkalenggipa manderangko dontongchina didianikoba on·angjolaha.
Ia rally-ko ong·atachi songsalo dal·drobaenggipa chadamberang ta·makku aro uandake sabisiko ra·bagipa bosturangoni chel·e dongna jotton ka·anggen ine ia rally-ko ong·ate mesokangaha.
