SHILLONG: A·doko medical seat-rangko re·baenggipa bilsisa ba bilsignio ge-300-oni 450-ona seat-rangko bariatna a·dok sorkari chanchia ine Chief Minister, Conrad K. Sangma u·iataha.
Shillong Medical College-o MBBS program-ko ia bilsioni a·bachengatgen, aro Tura Medical college-ko re·baenggipa bilsio MBBS course-rangko a·bachengatna ka·dongsoenga, ine Sangma u·iataha.
University of Science and Technology Meghalaya (USTM) Medical College-o MBBS program-ko a·bachengatmanaha ine ua u·iataha.
Ge-3 college-rangni ge·prako ge-100-150 medical seat-rangko on·a a·dok tarimanaha ine Chief Minister aganaha.
Meghalaya-ni gipin apalo medical college-rango ge-100 seat-rang donggipako man·chape Chief Minister aganaha, a·dokoni chatro chatrirangna chu·gimik seat number-rangara ge-550-ona barigen.
Shillong Medical College-oni MBBS poraigiparangni skanggipa batch 2030 bilsio graduate ong·gen, aro medical college-o a·dokni invest ka·gipa re·baenggipa bilsi 5-oni bilsi 7-rango namgipa result-rangko man·angna a·bachenggnok, ine Chief Minister aganaha.
Shillong Medical College-ko 2025 bilsini September jaoni chalaina man·aba donggnok aro Tura Medical College-ko 2026-2027 bilsirangoni a·bachengatna man·aba donggnok ine janapangaha.
Ge-6 medical college a·bachengatna ma·mong sorkarini dakchaka chu·sokaniko skie ra·na Health Minister Ampareen Lyngdoh, Uttar Pradesh-ona wenangnaba donga.
Tura Medical College jeon rika cho·anirang namroroenggipao a·dok nipilanirangko dakangenga ine Health Minister kobor ra·timgiparangna aganaha.
Ta·rake rikangani somoio adita neng·nikanirangkoba chagrongaha indiba PHE, Power aro PWD-ko man·chape mongsonggipa department-rang baksa Chief Minister chanchirimaniko dakani ja·man gimikon namate on·aha, ine ua janapangaha.
“Chinga rika cho·anirang baksa re·mikkangenga aro bang·a rika cho·anirangan namroroenga,” ine Lyngdoh agandapangaha.
