SHILLONG: Meghalaya a·dokni niksenggipa Living Root dolrangko a·gilsak gimikona gipatna kam ka·engon Chief Minister Conrad K Sangma Sukrobar salo Pynursla sub-division-ni ning·o ga·akgipa Wahlyngkhat-ona Living Root Bridges Experience Centre aro Wahkhen Residential Music Retreat-ko ong·atna am·enganina biaprangko nina re·angaha.
A·doko eco-tourism aro cultural-ko ripingna re·chakatanio dal·begipa miksongani bako tangka kror 70-ko ia ge-2 project-rango botangenga. Living Root Bridges Experience Centre ge·samangmangko tarina Community Public Private Partnership (CPPP) model-ni ning·o tangka kror 30-chi tarianggen.
Living root bridges-ko namnikgiparang bang·batani a·sel ma·mongna Wahlyngkhat-ko baseaha jean dingtangtegipa tarianina mangmangsan ong·aija indiba ong·telaigipa sambolrang aro joltangni daka rikani bewalrangni gisepgriko namgipa bakrimani donganian uamangni chin ong·a, ine Chief Minister Sangma kan·dike talatangaha.
Ia namroroa silroroanian tourism-ni daitona a·dok sorkarini on·kanggipa ong·a jeon ong·telaigipa sambolrnag aro jatni heritage-ko ripinganio joltangni manderangna namgnigipa ong·enga ine Chief Minister aganaha.
