TURA: Meghalaya Police-ni recruitment ba dingtang dingtang kamrangna porikkarangko Robibar salrango dakrongengani gimin Meghalaya Pradesh Youth Congress (MPYC) raken jegalataha.
MPYC-ni parakatani gitade, Robibar salara Kristianrangni olakkiani aro neng·takani sal ong·a aro Meghalaya a·dokara Kristian a·dok ong·e, Robibar salo Kristianrangna namen dingtangmanchagipa sal ong·ani gimin ia salo kamna porikkarangko ra·aniara ra·chakna man·gijani aro kragijani ong·enga.
Re·anggipa May-ni 18 tarik Robibar salo, Meghalaya Police-ni recruitment-ko ong·atahani gimin suk ong·gijaniko parakatengon, “NPP-chi dilenggipa MDA sorkarini iandakgipa porikkarangko Robibar salo ong·ataniara changsasan ong·ja indiba bang·a changon Robibar salrangosa ong·atrongbata. Ian manderangni toromni gita bebera·aniko sorkarini kamna nichanggalaniko mesokani ong·enga,” ine MPYC-ni general secretary Chireng Peter Marak parakataha.
Manderangni toromo bebera·aniko mande ra·ani pal a·dok sorkari, batanggimin somoirango chu dokkanrangko ‘Heaven Eleven’ ine mingna on·aha ine matnangatskaengon, “Iandakgipa sorkarini kamrangara, jinmani mikkango uamangni a·kanganirangko dingtangate mesokani ong·enga aro jatni daka rikanisan ong·aigija manderangni toromo bebera·anio sorkarini kamna jajrengna nanganiko ong·ata,” ine MPYC-ni general secretary parakataha.
Meghalaya Police-ni recruitment-ara ma·mong sorkarini ong·ja indiba a·dokni kamsa ong·ani gimin Robibar salrango ong·ataniara kraani ong·ja ine janapatskaengon, porikkani tarikrangko a·dok sorkari, Robibar salrango ong·atgija gipin salrangoba ong·atna man·aiachim ine MPYC parakataha.
A·dok sorkarini iandakgipa kamrangara BJP-ni sorkariko chalaiani baksa apsanangenga ine matnangatskaengon, a·doko songdongenggipa Kristianrangni namgnina iandakgipa porikkarangko Robibar salrango ong·atgija gipin salrango ong·atskachina MPYC didiataha.