SHILLONG: East Khasi Hills a·jani Mawkriah-o donggipa State Bank of India (SBI) ATM-oniko, machine-ko ratenba gong lak 28.13-mang ong·gipa tangkarangko cha·uangaha.
Police-rangni u·iatani gitade, ia a·sel ong·ani Budbar pringwalni 2:43 bajimango ong·aha.
Ia ATM-oniko cha·ugipa manderang gipin a·dokrangonisa ong·na nanga ine police-rang chanchichipenga.
Ia ATM-oniko cha·uaniba batanggimin somoirango Assam-ni dingtang dingtang biaprangoniko cha·ua gitan apsanangani gimin ATM-oniko cha·uanio apsan dolni manderangan jak dongengnaba gnang ine East Khasi Hills a·jani SP Vivek Syiem parakataha.
Syiem-ni aganani gitade, batanggimin somoirango jekai ATM-ko gas-chi ratprue cha·uahachim, apsan daken ia ATM-koba cha·ugiparang, gas-chi ratpruenba tangka paisarangko cha·uangaha.
Ia ATM-oniko cha·uanio mande sakbri jak donga ine CCTV camera-oniko nikna man·aha.
Ia a·selni bidingo Mawngap police station-o mokordoma ka·aha aro police-rang, cha·ugiparangko sandina a·bachengataha.
2023 bilsini December 20 tarikoba, West Garo Hills a·jao donggipa Rongram ATM-oniko apsan daken, machine-ko gas-chi so·e ratenba, tangka paisarangko cha·uangahachim ine nikna man·a.