TURA: West Garo Hills a·jani a·kawe jolrang aro North Garo Hills a·jani Mendipathar jolrango, gipin biaprangoni, mongsongbate Bangladesh a·songoni niam gri re·napbae songdong a·chaenggipa manderang batroroengaha ine Kharkutta-ni gitcham MDC Smith Momin parakatenba, Garo Hills-o songdongenggipa Tribal-rangni namgnina, niam gri songdongenggipa manderangko ta·raken am·sandienba biaptangtangona watatpilchina a·dok sorkariko didiataha.
Momin-ni parakatani gitade, Bangladesh a·songoni niam gri napsrukbaenggipa manderang bang·batan maming lekka gri Assam a·dok gitasa Garo Hills-ona re·napbaenga aro ia manderang da·o West Garo Hills a·jani a·kawe aro North Garo Hills a·jani Mendipathar jolrango songdongkamtokengaha.
“Garo Hills-o chengonin A·chikrang gipin Tribal jatrang baksa nangrime janggi tangtokengachim indiba da·o West Garo Hills a·jani a·kawe aro North Garo Hills a·jani Mendipathar jolrango, Tribal ong·gijagipa manderangsa bang·batpilengahani a·sel ian Tribal-rangna, mongsongbate A·chikrangna namen jajrengchakna nangani ong·engaha,” ine Momin parakataha.
A·songo niam gri songdong a·chaenggipa manderangko champengna gita ja·kurangko de·engani gimin ma·mong sorkariko mittelpilangengon, Garo Hills-oba dingtangmancha a·dok sorkarini gita, iandake niam gri songdongenggipa manderangko champengna ta·raken ja·kurangko de·china Momin didiataha.
Garo Hills-o niam gri songdong a·chaenggipa manderangko ta·raken sandichina gita a·dok sorkariko didiatengon, niam gri songdongenggipa manderangko sandianio Garo Hills-o songdongkamgipa Tribal-rangkoba bak ong·atchina, niam gri songdongenggipa manderangko sandianio nambate kam ka·na man·na gita ma·mong sorkari baksa nangrime kam ka·china aro gipin biaprangoni napsrukbae songdongenggipa manderangko sandianio dongimin niamrangko ja·rikchina Kharkutta-ni gitcham MDC mol·molataha.