SHILLONG: National Education Policy (NEP)-ara India a·songo lekka pora on·aniko badiaba jatrangnasan mikkang niteani, man·dapaninasan miksongani aro lekka porako bilchi sason ka·na miksongani gitasa ong·a ine ia NEP 2020-ko Meghalaya a·dokni All India Save Education committee jegalataha.
Ia All India Save Education Committee, a·songni pilak a·dokrangon donga aro Bristibar salo Meghalaya-ni committee, ia NEP 2020-ni pal Draft People’s Education Policy-ko oprakatskaaha.
Ia policy-ni bidingo committee, dingtang dingtang dolrangni agan-ku·pattianirangko am·enga aro uni ja·man People’s Education Policy (PEP)-ko re·baenggipa 2026 bilsini January jao Bengaluru-o People’s Parliament-ko ong·atanio oprakatgen.
Ia committee, India a·songo lekka porani namgnina NEP-ni pal PEP draft-ko ra·gatskana gita ma·mong aro Meghalaya sorkari baksaba agangrikna miksongenga.
Ia committee-ni parakatani gitade, 2020 bilsio COVID sajinmana a·song gimikon lockdown-ko ong·atengmiting somoiosa ma·mong sorkari, jera ra·grikna aro chanchirimna gita Parliament-ona ra·anggija Cabinet an·tangari ia NEP-ko ra·gatahachim.
Iani bidingo program-ko ong·atanio committee-ni convenor Samborlang Dkhar, jinmana aganprakengon, ia NEP-ara India a·songo lekka porani bewalko nisigalna sienga aro uamang PEP-ni draft-ko nambatatna gita a·song gimikon chanchirimna sienga ine parakataha. A·song gimik chanchirimani ja·man, ia PEP draft-ko January jao Bengaluru-o ong·atna sienggipa National People’s Parliament-ona ra·anggen ineba ua aganaha.
A·songo NEP-ko ra·gata intalan poraianiko dontonganiba batangaha ineba committee-ni membor-rang parakataha.
Ia committee-ni secretary Batskhem Myrboh-ba iani bidingo janapatengon, a·songo Education system-ko naljokatna sikenggipa manderang baksa chanchirimchengesa All India Save Education Committee-ni bipekko songaha ine parakataha.
The Shillong Times-ni Editor Patricia Mukhim-ni aganani gitade, PEP draft-o lekka porani pilak bewalrangkon man·chapani gimin ian NEP-na bate nambate nikenga.
Meghalaya a·dokni mitam skulrangkode skigipa saksanchisa chalaiengani gimin me·mang skulrangko chalaiani gitasa ong·enga ine janapatengon, ia pilak neng·nikanirangkon PEP-o namatani cholrang donga aro a·dok sorkariba ia niamrangko nichenge PEP-ko ra·gatna nanga ine Mukhim aganaha.
Gitcham IAS officer Toki Blah-ba iani bidingo janapangengon, PEP-ni bidingo manderang name nichengna nangenga aro a·dok sorkariba iani bak ong·na man·gen ine aganaha.
NEHU-ni Professor H Srikanth-ni parakatani gitade, PEP-ni draft-ko matchotahaon, uamang ma·mong sorkari aro a·dok sorkarinaba NEP-ni pal PEP-ko ra·gatchina didianggen.
 |
ReplyForward
|