SHILLONG: 2047 bilsini gisepo India a·songko ‘Vikshit Bharat’ ong·atna chanchirimna gita a·songni Prime Minister Narendra Modi-ni dilanichi Chief Minister’s Conclave-ko ong·atanio a·dokni Chief Minister Conrad K Sangma-ba National Democratic Alliance (NDA)-ni gipin dilgiparang baksa bak ra·angaha.
Ia tom·bimonganio bak ra·ani bidingo social media-o jinmana u·iatengon, namgipa sorkariko chalaiangkuani, dingtang dingtang a·dokrangni gisepo bakrime kam ka·aniko nambatatani aro a·songni namroro silroroaniko ta·rakbatatna gita a·doktangtangni chu·sokgipa kamrangko mesokgrikna gita ia tom·anio dingtang dingtang a·dokni chief minister-rang chanchirimangaha ine Sangma parakataha.
“2047 bilsini gisepo Vikshit Bharat-ko ong·atna niksamsoaniko chu·sokgipa ong·atna ku·cholsan nangrime kam ka·aniko bilakbatatani bidingo chief minister-rang chanchirimangaha,” ine a·dokni Chief Minister, social media-o parakataha.
Ia tom·anio, Operation Sindoor-ni sipairangna aro India a·songni sipairang ka·dongbee warachakahani gimin dingtangmancha mande ra·pilskaanikoba dakangjolaha.
“Operation Sindoor-o ka·dongbee warachakahanina aro sipai dolrangni ka·donganikoba chinga ia salo mittelpilangskaaha. Uamangni on·kange a·songko chel·chakanichi a·songni manderang naljokaniko man·aha,” ine Sangma parakataha.
A·songni kosako chakatanirangko bon·atani giminba Chief Minister janapataha.
“Bobil dake chakatgipa dolrang aro je dolrangan a·songni tom·tomaniko aro naljokaniko pe·na jotton ka·engachim, uandakgipa dolrangni kosako India a·song ku·cholsan ong·e chadengenga,” ine Sangma parakataha.
Ia conclave ba tom·bimonganiara, 2047 bilsini gisepo dingtang dingtang miksonganirangko chu·sokatanio, dingtang dingtang a·dok sorkarirangko ku·cholsan ong·e kamrangko ka·china ma·mong sorkarini didianiba ong·a.
