SHILLONG: Toll aro check gate-rangko kulina dongimin niamrangko nipiltaina gita Khasi Hills Autonomous District Council (KHADC) tik ka·angaha.
Iani bidingo talataniko on·angengon, toll aro check gate-rangko kulina dongimin niamrangni bidingo District Council Affairs (DCA) department-ni ge·etanirangko KHADC ja·rikna kusi ong·aigen ine KHADC-ni Executive Member (EM) Trade In-charge Winston Tony Lyngdoh parakataha.
Indake ong·genchimoba, iandakgipa ge·etanirang dongama dongja uko KHADC-ni Executive Committee (EC) nichengna nanggen ine ua aganskaaha.
“Iandakgipa niamrangni gimin chingade ma·sia dongja indiba ge·etanirang donggenchimode chinga uarangko ja·rikna man·aigen,” ine KHADC-ni EM aganaha.
KHADC-ni ning·o check gate-rangko kulipiltaiahani gimin adita salrangna skangsan DCA department-oni, Executive Committee-ni secretary-na seatahachim ine nikna man·a.
National highway, state highway aro a·jani mongsonggipa ramarango toll gate-rangko kulina gitade, Road Transport & Highways aro a·dok sorkarioniko No Objection Certificate-ko ra·chengna nanga ine DCA department, talataniko on·atahachim.
2022 bilsini June jao a·dok sorkari, KHADC aro JHADC-ni ning·o donggipa national highway aro state highway-rango chalaienggipa pilak toll gate-rangkon chipchina gita ge·etaniko on·angahachim.
A·dokni Chief Minister Conrad K Sangma aro Deputy Chief Minister Prestone Tynsong-ni dilanichi tom·aniko ong·atanio KHADC aro JHADC-ni ning·o chalaienggipa toll gate-rangko chipna tik ka·angahachim.
Adita salrangna skangsan, Umdihar-o donggipa toll gate-ko maming u·iatsamsoani gri ba chanchirimchengani gri chipatahani gimin Ri Bhoi district administration-ni kamko KHADC jegalatahachim.
Iani bidingo a·dokni Deputy Chief Minister aro DCA Minister Prestone Tynsong-ba niam gri chalaienggipa pilak toll gate-rangkon chipna nangaigen ine aganaha.
