SHILLONG: Madhya Pradesh a·doko donggipa Indore songjinmaoni Meghalaya a·dokona rona re·bagipa jiksesa, re·anggipa Bristibar salonin, Sohra-o gimaenga ine kobor on·aha.
Koborko on·ani gitade, ia jiksesara bilsi 29 ong·gipa Raja Raghuvanshi aro uni jikgipa Sonam ong·a aro uamangko gimana skang Sohra-o nikahachim.
Ia a·selni bidingo kobor ra·timgiparangna u·iatengon, ia tourist-rang, Shillong-oniko scooty bolsako para ra·e Mawlakhait-ona re·angaha aro uanoni uamang Nongriat-ona re·ange, Shipara Homestay-o waltueaha ine East Khasi Hills a·jani Superintendent of Police (SP) Vivek Syiem parakataha.
“Nongriat-oni uamang pring 5:30 bajimangon re·angpilaha aro ja·mano Mawlakhait-ona re·angaha. Indiba uamangni scooty-ko Mawlakhait-onikode man·ejaha aro ja·mano songni manderangsa May-ni 23 tariko, Sohra Rim-o donggipa Golden Pines Dhaba sambao gale donangako man·aha,” ine ua aganaha.
Ia scooty-o chabiba dongkuengachim aro ia scooty-ko songni manderang ja·mano police-rangna pakwate on·ataha.
Iani ja·mansa ia jiksesani gimaani bidingo police control room-na kobor on·ataha aro uamangni ma·drangrangba missing report-ko on·aha ine SP parakataha.
“Chinga ia mande sakgnini bidingo, samba jolo donggipa songni manderangna aro dingtang dingtang dolrangnaba u·iataha aro uamangko police-rang baksana home guard-rangba sandina dakchakenga,” ine Syiem aganaha.
Ia mande sakgnini gimaanio maiba ong·gija dakanirangko chanchichipanirang dongama ine sing·anina aganchakaniko on·angengon, “Da·o dipetde iani bidingo mamingkoba aganna gita man·kujawa aro da·o dipet chingni kamde uamangko sandianisa ong·enga. Uamangko bon·kame Nongriat-o nikrikaha aro uamang pringnian ong·katangaha. Chinga da·o uamangko sandiengkua,” ine SP aganaha.