TURA: South Garo Hills a·jani Darit-Betegre songo Aadhar card-rang dongjani gimin manderangni job card-rangko dontongatani ja·man Gasuapara Block Development Officer (BDO)-ni kosako social activist Greneth Sangma, South Garo Hills-ni Deputy Commissioner-na badi ka·doangaha.
Gasuapara BDO-ni kosako South Garo Hills-ni Deputy Commissioner-na badi ka·doanganio Sangma-ni parakatani gitade, ma·mong sorkarini dingtang dingtang scheme-rangko ra·na gita Aadhar-ko nangtelgen ong·ja ine Supreme Court-an rai on·manahachim aro Meghalaya a·dokkoba Aadhar Act-ni niamrangoniko watahani gimin ian manderangna nangtelgipa ong·jaengachim.
Iandakgipa scheme-rangna sorkari department-rang, dingtang cholrangko ra·gatskana nanga ineba Sangma parakataha.
Ia kamko ta·raken nirokatchina Deputy Commissioner-ko didiatskaengon, songni manderang kamrangko ka·e cha·pana man·na gita job card-rangko on·pilchina, Aadhar-ko nangatgija pilak namgnirangkon songni manderangna on·china, job card holder-rangna uamangni man·gnirangko ta·raken on·china gita Sangma mol·molatataha.
