SHILLONG: Uko aro uni nokdangko so·ote galna ka·mikkenataha ine matnangatenba, Facebook-o Salgro Salaram ine biming dongipa mandeni kosako Flaming B Marak minggipa social activist saksa a·dokni Director General of Police (DGP)-na badi ka·doangaha.
Iani bidingo a·dokni DGP-na badi ka·doatengon, adita salrangna skang social media-o Pakistan a·songna chake post ka·gipa chadambe sakgnini bidingo ua an·tangni Facebook account-o post ka·atani ja·man, Salgro Salaram ine biming dongipa mande, uko aro uni nokdangko so·ote galna ka·mikkenataha ine Marak parakataha.
Marak-ni parakatani gitade, adita salrangna skang, India aro Pakistan a·songni gisepo so·sojengjeng ong·engmiting somoio A·chik chadambe saksani a·songtangko chonnike, Pakistan a·songna chakpaaniko social media-o parakatahani gimin police-rang, chadambe sakgniko rim·aha aro iani bidingo songbad kingsao seakosa ua an·tangni Facebook account-o post ka·atahachim. Indake ong·genchimoba uni FB-o post ka·atani ja·man, FB-o Salgro Salaram ine biming dongipa mande, uni kamko jegalatenba, uko aro uni nokdangko so·ote galna ka·mikkenataha.
Iani bidingo sandirokanirangko dakenba, FB-o Salgro Salaram ine biming dongipa mandeni kosako rakgipa ja·kurangko de·china gitaba ua didiataha.
