Kamrangko nipilna Cabinet Minister, Sohra-ona re·anga
SHILLONG: Re·anggipa May 23 tarikoni Sohra joloo gimaenggipa tourist sakgni, chong·motan Madhya Pradesh a·doko donggipa Indore songjinmaoni Raja Raghuvanshi aro Sonam Raghuvanshi-ko police-rang, songni manderang baksa sandiengoba da·alonan man·pilkujaenga ine kobor on·aha.
Ia jiksesa, re·anggipa May 22 tariko, Mawlakhait songona sokbae, songo manderangko re·dilgipa Bah Wansai baksa Nongriat-ni Double Decker Root Bridge-ko nina re·angahachim. Uamang Nongriat-o, Shipara Homestay-o waltue, May-ni 23 tariko Mawlakhait-ona re·angpilna gita ia homestay-oni re·ongkatangaha indiba ua somoionin uamang jiksesa nikpiltaijaha.
May-ni 24 tariko, uamangni para ra·e re·anggipa scooty-ko Sohrarim-oniko man·aha aro iani ja·mansa uamangni gimaani bidingo police-rangna FIR ka·angaha.
Indake ong·engon, gimaenggipa manderangko, K9 unit-rang, North Eastern Space Applications Centre (NESAC)-ni drone-rang aro Special Operation Team (SOT)-rangni dakchakanichi dolgittam sipairang, Nongriat-Pyndemdkhar-
Sandienggipa dolrang, ia tourist sakgniko, Shillong-oni Sohra-ona dakanggipa Mawkdok, Umdiengpoh, aro Sohra Rim a·dramrangonikoba sandienga ine official-rang u·iataha.
Indake ong·engon, gimaenggipa tourist sakgniko sipai dolrangni sandianiko nipilna gita Budbar salo a·dokni Cabinet Minister AL Hek, Sohra-ona re·angaha aro kamrangko nambate ka·china official-rangko didiangaha. Gimaenggipa tourist-rangko sandianio pilak nanga dakchakanirangko on·na gitaba Cabinet Minister ku·rachakaniko on·angaha.