AMPATI: Ia sal somoirangara wachini somoi ong·e Ampati jolrango bijolirang sirongengani gimin kamrangko ta·rake dakchake on·na man·na gita Ampati MePDCL Division-o sak 12 casual worker-rangko rakkichina A·chik Holistic Awakening Movement (AHAM) South-Western Zone (SWZ) Ampati dabiangaha.
AHAM-SWZ Ampati-ni president Wester G Sangma-ni parakatani gitade, MePDCL Ampati Division-o kam ka·giparang chu·ongjaengani a·selan da·o gita bijoli nosto ong·ani somoirango kamrangko ka·na man·jaenga ine koborko man·soahani gimin ia wachini somoirango kamrangko dakchake on·na gita komibeoba sak 12 casual worker-rangko rakkichina, South West Garo Hills a·jani Deputy Commissioner aro MePDCL-ni official-rangko didiataha.
“Ampati jolrango da·o gita wachini somoirango bijolirang nosto ong·rongani a·sel neng·nikanirangko chagrongna nangtokronga aro iandake bijolirang nosto ong·on, jolo songdongenggipa manderang, mongsongbate poraienggipa chatro chatrirang neng·nikanirangko chagrongna nangtokronga. Ia sal somoirango an·chingna bijoliara nangchongmotgipa bak gitan ong·ahani gimin salantian an·chingna bijoliko nangaia,” nine AHAM SWZ Ampati-ni president parakataha.
AHAM SWZ Ampati-ni u·iatani gitade, wachini somoirango kamrangko dakchake on·na man·na gita MePDCL Ampati Division-o Lower Division Assistant (LDA) sakgni, Meter Reader sakgni aro Field Casual Worker sakchetko rakkichina gita uamang, SWGH a·jani Deputy Commissioner aro MePDCL-ni official-rangko didiataha.
