SHILLONG: Maghalaya a·doko pekatgipa samrangko jakkalgiparang komiangan baksa Meghalaya-ona pekgipa samrangko badingsrukbaanirangba komiaha.
Pekatgipa samrangko jakkalgiparang aro pekgipa samrangko badingsrukbaani ia minggnian komiangaha, ine DREAM Mission Director Francis Kharshiing aganaha. Garo Hills baksa Meghalaya-o pekgipa samrangko badingsrukgiparangko rim·na jotton ka·angggen ine ua ku·rachakaha.
Iarangni bidingo stakeholder-rang baksa mejamangmang Mission Director Tura-ona re·ange agangrikanirangko dakangaha. Nongstoin-o damgipinko kulina chanchidapan baksa Tura-o rehabilitation centre-ko a·bachengatna NGO baksa bakrimenga.
“District ge·antion ge-1 detox centre aro komibeoba damsa rehabilitation centre-ko kulina chingni nisan ong·a,” ine ua aganaha. A·doko psychiatric-rang komienga, ine ua agandapangaha.
Kerala-o bang·a psychiatric poraigiparang donga uamangko Meghalaya a·dokona rim·bana agangrikanirangko dakenga.
