Abiel-ni siani mamlako am·sandichina Chambugong Association mol·mola

TURA: Batanggimin May jani 13 tariko RIMS, Imphal-o B.Sc 1st year-ko poraigipa bilsi 21 ong·gipa Abiel Salchiana Ch. Marak-ni tanggitik siani mamlako am·sandichina All Garo Hills Chambugong Chra Association, Manipur-ni Governor-ko mol·molataha.
Manipur-ni Governor-na seatgipa chittio, Abiel-ni siani mamlako parak ong·e maming donnua gri am·sandie kakket bichal ka·e on·china janapataha. ‘Abiel-ni salgro salaram a·jolni ge·sa niksenggipa institution RIMS-o poraianiara nokdangna aro mahari-ma·drangna mikkim rasongni katta ong·achim. Bilsi 2023 October 19 tariko B.Sc Nursing-o admission ra·ahachim indiba uni tanggitik somoina skang a·gilsakko watanganiara uni nokdangna aro mahari-ma·drangna bilongen dukniko ra·baaha. Uni gimin Abiel-ni an·tangko so·ote sia ingipa kattako chinga ra·chakna amjaenga, ua maiba dake insitution-o gisikni gita sinjetanirangko ba sakgipinrangni kal·stape roanirangko man·akon ine chanchipani gimin am·sandianiko dakchina mol·molatenga, ine chittio janapataha.
Sina skang, Abiel, ma·gipa baksa agangrikataon, uko porairimskagiparang gisik gita sinjetaniko duk -neng·nikarangko on·a ine aganataha. Senior student-rang uko duk on·a ine ma·gipana parakaha.
May jani 5 tariko ma·gipa baksa agangrikatao Abiel, senior-rangni duk on·ako chakna amjae nokona re·bapilna sikaniko aganaha. May 9 tarikoba Abiel, WhatsApp gita uni jako IV canula sikako photo ka·e wataha. Jingjengatani salo cha·a ringa gri okumu chakani a·sel ua saaha, indiba maming simsakaniko man·jaha. Iandakgipa obostarangko chagrongna nangahani gimin Association, raken jegalataha.
Indake May 13 tarikode Abiel-ko senior-rang kal·ake roaha, Abiel-ni ma·gipana watgipa message-rang sakki donga. Indakpile niksenggipa institute-o iandakgipa simsakgijanirangko aro senior student-rangni gital fresher student-rangko kal·ake duk on·e roanirangko talen u·ina man·aha ine Association janape, Manipur-ni Governor-ko name dake am·sandichina mol·molataha.
Indake association, Abiel-ni an·tangko so·ote sia inako bebera·na amgijako parakaha, ian ragging-ni mamlasa ine aganaha.