Class XI-o addmission ka·na biapko man·jaenganina institution-ko kulidapchina FKJGP dabia

Tura: West Garo Hills a·jani chatro chatrirang chu·bata gadango poraidapangna admission-ko ka·na biaprang dongjani a·sel man·jaenga uni gimin chatro chatrirangna institution-rangko kulidapaniko nangnike Chief Minister Conrad Sangma-na Garo Hills-ni FKJGP chittiko seataha.
WGH, DC-ni gita chitti seatgipa watata, SSLC result-ni bidingo CSO changni chang sing·doanirangko dakangaha aro da·o dipte maiko dakengaha.
National Education Policy 2025 baksa ritingo SSLC porikkako jarikangna man·kujana jajrenganirangan batrikrikenganirang dongengaha ine FKJGP aganaha.
“Iano jajani donga jeon a·songni gipin bakrang baksa apsan ritingo kam ka·angna a·dok sorkari a·bachengataha. Iano matnangatani gita wa·al chingchaenga jeon ia bilsio ra·biani gri dake tariangna aganaha. 1993 bilsioni skanggipa changna supplementary porikkako ong·ataha,” ine president Pritam Arengh aganaha.
“‘CM GuideBook’ bimingni gita Guide Book-ko 2024 bilsio parakangaha, jeon dingtangmancha 2025 bilsini SSLC porikka segipa chatro chatrirrangko nisan donaha aro ian niamgri ong·enga jeon 80%-ni gita sing·anirangan 2025 bilsini SSLC porikkao sokbatokaha je sing·anirangna aganchakanirangan ki·tapon dongachim,” ine Arengh matnangataha.
Pass ong·gipa bang·a chatro chatrirang chubata gadango poraidapangna biaprangko man·jaengani a·sel neng·nikani sokbaaha, ine CSO aganaha.
CSO, jean Tura songjinmani dingtang dingtang sorkari aro private educational institution-rangona wene niangaha, komibeoba sak 300 chatro chatirang enroll ka·na man·kujaenga ine janapataha. Bang·a skulrnago aro college-rang donga jeon biaprang dongako uamang man·achim indiba uarang gimikan dam rakbea jeon bang·batan songjinmani apalo ong·achim.
“Meghalaya sorkarioni maming ja·ku de·a dongja ong·ode ia chatro chatrirang uamangni academy-o poraianinko watgalna draatako man·gen,” ine secretary Matsrang Sangma aganaha.
Neng·anikaniko ta·rake namatna dingtang dingtang institution-rango pringo aro attam-o dake class-rangko ra·na kulichina uamangni seatgipa chittio FKJGP janapataha.
“Bang·bata chatro chatrirangan tangka paisarangni gita neng·nikaniko man·giparang ong·a, sorkari institution-rango Tura Government College-ni fee gamani gita dakchina chinga ku·pattia ong·jaode uamang poraianiko watna nangao ga·akgen. Iako sorkarini gita namgipa kam dake dakna man·gen,” ine Arengh aganaha.
A·doko gimikni gita kamrangko name dake ong·kuja dipet NEP-ko ra·gatjawa, iano nangchongmotgipa rika cho·ani, skie on·enggipa staff-rangko bilakdapatna aro stakeholder-rang gimikni tarisamsoanio agananiko man·chapata.
“Chatro chatrirang, skigiparang, academy-rango kam ka·giaprang aro Education Department-oni kam ka·giparangni gita chingna bilake chakpaaniko on·ani dake ia chanchianiko chinga namnika jeon ia neng·nikani somoio National Education Policy (NEP)-ni structure-na dingtangenganio nosto ong·ana bate Meghalaya a·dokni Education a·ba gimiko namgniko man·a nambata,” ine Arengh aganaha.