SHILLONG: United Democratic Party (UDP)-ni a·gipi dilgipa Dr Jemino Mawthoh, party-oni ong·katna parakaha, unbaksana Meghalaya sorkarini una on·gipa Honorary Adviser post-oniba ong·katna parakaha. Kam watani lekkako UDP-ni President Metbah Lyngdoh-na on·aha.
Dr Mawthoh, batang-gimin bilsi 2014-onin UDP baksa kam ka·engachim indiba ua gelna man·-gijagipa obostarangko janape kam wataha. Adita bilsirangna party-ni uo bebera·anina aro cholko on·anina party-ko mittelaha.
Bilsi 2014-oni ua UDP-ni working president ong·e dangdike on·aha, uni ja·man bilsi 2016-oni kam wataona party-ni General Secretary ong·e dangdike on·aha.
“Bilsi 2014-onin Legislator, Working President aro General Secretary ong·e party-na dangdike on·na cholko man·anina anga rasong chabea ine Dr Mawthoh uni chittio janapaha.
Policital-oni ong·kata baksana Dr Mawthoh, Planning, Investment Promotioin and Sustainable Development Department-ni Honorary Advisor post-oniba ong·kataha.
Dr Mawthoh-ni party-oni ong·kataniara UDP-o dilgiparangni gisepo meligrikgijani ong·engako chanchipenga.
Indiba party, da·odipetde iani bidingo mamingkon agankuja. Indiba saksa a·gipi dilgipani tanggitik kam wataniara organisation-na dal·bea gimaani ong·a. Mongsongbate bilsi 2026-o Rajya Sabha electiona ro bilsi 2028-o Assembly election-na a·dokni political dolrangni tarisoani somoio iandakgipa tanggitik ong·kataniara namen jagokpilani ong·a.
Dr Mawthoh-ni party-oni ong·katani chong·mot a·selkode talkujaenga indiba uni kam wataniko knaani ja·man manderang, Dr Mawthoh-ko gipin political dol baksa bakrimnaba dongakon ine chanchipenga.
