BAJENGDOBA: North Garo Hills Bajengdoba C&RD Block-ni ning·o donggipa Jetdoba songo Jiban Integrated Village Coperative Society (IVCS)-ni gita gital Weaving Production Centre-ko North Garo Hills-ni Deputy Commissioner Dr. Abhishek Saini aro Block-ni officer-rangni dongpaanichi Bajengdoba-ni MLA Pongseng R Marak-ni jakchi Sonibaro oprake on·angaha.
Ia gitalgipa weaving production centre-ni gimin MLA Pongseng R Marak jinmana aganangengon, na·simangni Jetdoba jolo ia gitalgipa weaving centre-ko man·ania na·simangni janggi tangani cholko tang·doatna adita dakchakani ong·gen aro ia weaving centre-ko sichipatoba na·simangni jakon aro tang·doatnaba na·simangni jakon ong·a uni gimin iako bilakatnade na·simangni dilgiparang aro na·simangni member-rang gisik nange kam ka·na nanggen maina ia weaving centre-ko chalaianio chu·gimikan na·simangni jakon ong·a. An·ching A·chik jatrangba jatni gandingrangko sike koe an·tangtangna tangka paisa man·ani cholrangko dake ra·na nanga, gipin jatrangde sorkarini dakchakaniko ra·e iandakgiparangchin a·bachengna man·ode an·ching A·chikrangba maina man·jawa ine Marak aganangaha. Ia program-o Textile Department-ni gita ong·atgipa training-o bak ra·giparangna Certificate-rangkoba suale on·angjolaha.
