SHILLONG: United Democratic Party (UDP)-oni ong·kate, sorkarini kamko watanggipa UDP-ni gitcham general secretary Jemino Mawthoh, party-ona re·bagenchimode uko nokchaksona kusi ong·aigen ine a·dokni Bharatiya Janata Party (BJP) parakataha.
Jemino Mawthoh, party-ona re·bagenchimde uan party-na gamchatbegipa gam-jin gita ong·genchim ineba BJP a·kangataha.
Da·o dipet Jemino Mawthoh baksa agangrikanirangde dongkuja ine talataniko on·angskaengon, ua party-ona re·bana kusi ong·genchimoba una do·gako oe donaigen ine BJP parakataha.
“Da·o dipet chingni gisepo maming agangrikanirangde dongkuja indiba BJP-ona re·bana sikenggipa je manderangkoba chingade kusi ong·e rimchaksoaigen. Jemino Mawthoh saksa kamni gimin u·i-ma·sigipa mande ong·a aro ua ching party-ona re·bagenchimode uan chingna gamchatbegipa gam-jin gita ong·gen,” ine BJP-ni chief spokesperson Mariahom Kharkrang aganaha.
UDP-ni saksa ja·delbatsranggipa dilgipa aro gitcham MLA Jemino Mawthoh, re·anggipa Sonibar salo, UDP-oni ong·kate, a·dok sorkario Honorary Adviser ong·e ka·enggipa kamkoba watangahachim.
Uni rang·gitik iandake UDP-oni ong·katanganiara, re·baenggipa 2026 bilsini Rajya Sabha MP election aro 2028 bilsini Assembly election-na kamrangko ka·samsoanio UDP-ko bilgriata gita ong·aha.
Kamtangko watangna skang Mawthoh, UDP-ni working president aro general secretary ong·e kamko ka·angaha. 2019 bilsini Lok Sabha election-oba ua Shillong constituency-oni susaahachim.