Sak 1000-na baten nangchakeaniko man·anga
SHILLONG: Sonibar salona kingking batanggimin salgittamna a·dokni dingtang dingtang biaprango mikka balwarang ta·rakanganichi komibeoba saksni manderang sina gita nangaha aro sakbri manderang saknaanirangko man·na nangaha.
State Disaster Management Authority (SDMA)-oni koborko on·ani gitade, a·dokni dingtang dingtang biaprango mikkarang jimbee waangan baksana balwarangba ta·rakanganichi sak 1000-na baten nangchakeaniko man·aha aro bang·a biaprangon, nok-jamrang aro rama jal·langrangba nosto ka·ako man·tokaha.
Sonibar attam 6:00 bajiona kingking SDMA-ni segataniko parakatani gitade, a·dokni dam 10 a·jarang aro dam 49 block-rango sak 1094 manderang nangchakeaniko man·aha, te 28 nokrang aro dam 33 rama jal·lang aro gipin rikanirangba nosto ka·ako man·tokaha.
Sonibar salo, mikka waani aro balwa ta·rakanganichi a·arangni be·anirangko u·iatengon, West Khasi Hills, Ri Bhoi a·jani Amjok aro Sumer Latara, South West Khasi Hills a·jani Manad aro Eastern West Khasi Hills a·jani Mawkhli jolrangoba bang·en a·a be·anirangko nikna man·aha ine SDMA official-rang parakataha.
Chi bananirangko u·iatskaengon, Shella-ni Kalatek jolo nok te·gniko chi man·angaha ine official-rang parakataha. Ranikor Block-ni Maheshkola jolo balwarang ta·rakanganichi bolrang pangpikatako man·e adita nokrangko nosto ka·angaha aro bang·a block-rangon bijolirangni nosto ong·anirangkoba nikna man·aha ine SDMA official-rang parakataha.
Indake ong·engon, chi banani aro a·arang be·anirangchi nangchakea man·gipa nokdangrangna sorkari, cha·ani aro dingtang dingtang bosturangko watataha ineba official-rang parakataha.
SDMA official-rangni u·iatani gitade, Sukrobar attam 6:00 bajiona kingking mande siani sakgni ong·aha aro uni ja·man konta 24-ni gisepo mande sakbonga siangdapaha.
Sianggipa manderangara, East Khasi Hills a·jani Mawkynrew block ning·o donggipa Kharang songni bilsi 14 ong·gipa Mebanskhem Mukhim, West Garo Hills a·jani Dadenggre Block ning·o donggipa Kentapara songni bilsi 7 ong·gipa Batgrikchi A Sangma aro bilsi 13 ong·gipa Brime D Sangma, Rambrai-Jyrngam constituency-o donggipa Maspara songni bilsi 26 ong·gipa Epish N Sangma, Ri Bhoi a·jani Bhoirymbong block ning·o donggipa Kyrdeng songni bilsi 36 ong·gipa Nikolas Kharpran, East Khasi Hills a·jani Laitkroh-Khatarshnong block ning·o donggipa Lumkyntung songni bilsi 45 ong·gipa Klosliya Kharkongor aro Pomlakrai jolo donggipa Mawbynna-oni bilsi 35 ong·gipa Samborlang Tariang ong·a.