SHILLONG: National Law University Meghalaya (NLUM)-ni Vice Chancellor Prof Indrajit Dube, a·dok sorkarini gong lak 3.56 tangkarangko chuna koros ka·aha ine Khasi Students Union (KSU) matnangatenba, Prof Dube-ni kosako sandirokanirangko dakchina aro nangani kri ja·kurangko de·china sorkario dabiangaha.
KSU-ni parakatani gitade, NLUM VC-ni kosako RTI ka·e am·sandion uni songre songgabatanirangna aro dingtang dingtang kamrangna gong lak 15-na baten sorkarini tangka paisarangko koros ka·aha ine ma·sina man·aha.
VC-ni kosako RTI ka·e am·sandion, ia bilsini February 20 tariko Delhi-o NLUM-ni ‘Climate Investment Coalition for the Global South’ program-ko ong·atanio, chumangmangna gong lak 3.56 tangkarangko koros ka·aha aro unbaksana dal·dalgipa restaurant-rangoniko cha·anirangko breanio bang·en tangka paisa koros ka·aniko nikna man·aha ine KSU-ni general secretary Donald V Thabah parakataha.
Ia program-ko ong·atanio gong lak 25 koros ong·ahani giminde KSU jegalenga ong·ja indiba ia tangkarangara sorkarini ong·ani giminsa jegalenga ineba Thabah parakataha.
Iani bidingo KSU-ni general secretary Thabah-ni dilanichi adita sak dilgiparang, a·dokni Law Minister Ampareen Lyngdoh-ko Sonibar salo grongenba, iani bidingo sandirokatchina aro Prof Dube-ko ra·galchina gitaba dabiangaha.
“Chingni RTI ka·e am·sandianio man·ani gitade, NLUM-ni Vice Chancellor Prof Indrajit Dube, sorkarini tangkarang, ua manderangni tangkarang ong·a, ia tangkarangchi gipin biaprangona re·angronga. Ia kamrangara ua an·tangni kamrangsa ong·genchimode maikai ua manderangni tangka paisarangko jakkalna bil donga? Delhi-o ong·atanggipa program-oba gong lak 25 koros ong·pile uamang manderangni tangkarangko jakkalaha. Salsani gisepon ua chu brena gita gong lak 3.56 tangkarangko jakkalaha, indide ua saksa NLUM-ni VC ong·e manderangni tangka paisarangko chu ringna jakkalna man·ama?” ine KSU-ni general secretary sing·doangaha.
Indake ong·engon, Prof Dube-ni kosako sandirokanirangko dakna gita a·dokni Law Minister, jagni somoiko ra·skaaha.
