Siani a·selko sandirokna Special Investigation Team-ko songa
SHILLONG: Madhya Pradesh a·doko donggipa Indore songjinmaoni bia ka·daldale re·bagipa tourist sakgni, jemangan sal 10-na skang Sohra jolo gimaahachim, uamangoni saksani sogimin manggisiko Sombar pringo, Weisawdong chidare sambao donggipa Mawsanew a·kuangoniko sandienggipa dolrang man·aha.
“Me·asa saksani sogimin manggisiko Weisawdong Falls jolo donggipa a·kuangoniko man·aha,” ine police officer saksa, kobor ra·timgiparangna parakataha.
Police officer-ni u·iatani gitade, ia manggisiko man·ani ja·man, Sohra jolo gimaenggipa Raja Raghuvanshi aro Sonam Raghuvanshi-ni ma·drangrangkoba okamate, ia manggisiko mesokon, ia manggisiara Raja Raghuvanshi-ni manggisian ong·a ine uamang police-rangna parake on·aha.
Bia ka·daldale re·bagipa jiksesa, chong·motan Sonam Raghuwanshi aro Raja Raghuwanshi, re·anggipa May 22 tariko, Mawlakhait songona sokbae, songo manderangko re·dilgipa Bah Wansai baksa Nongriat-ni Double Decker Root Bridge-ko nina re·angahachim. Uamang Nongriat-o, Shipara Homestay-o waltue, May-ni 23 tariko Mawlakhait-ona re·angpilna gita ia homestay-oni re·ongkatangaha indiba ua somoionin uamang jiksesa nikpiltaijaha.
May-ni 24 tariko, uamangni para ra·e re·anggipa scooty-ko Sohrarim-oniko man·aha aro iani ja·mansa uamangni gimaani bidingo police-rangna FIR ka·angaha.
Iana skang, May-ni 22 tariko uamang, Saitsohpen Sohra-o donggipa Manha Homestay-oba napangahachim indiba ia homestay-o biap dongjani gimin aro mikkarang jimbee waengani gimin an·tangtangni bakosrang baksa biming aro phone nomborko on·e, uamang gipin biapko sandina re·angaha aro ja·manosa uamang Nongriat-ona re·angaha ine official-rang parakataha.
Indake ong·engon, ia mandeni jikgipa Sonam Raghuvanshi-koba police dolrang, Nongriat-Pyndemdkhar-
Ia manderangko sandianio police-rang, K9 Sniffer dog aro drone-rangko jakkalengani gimin Sombar pringo ia sogimin manggisikoba drone-chisa nikna man·aha ine police officer parakataha.
Raja Raghuvanshi-ni siani a·selko ma·sina man·na gita a·dok sorkari, iani bidingo sandirokna Special Investigation Team (SIT)-ko songe on·angaha.
Sogimin manggisiko man·gipara Raja Raghuvanshi-ni manggisian ong·a ine sianggipa mandeni jong-ada Govind Raghuvanshi, police-rangna parake on·angani ja·man uni siani a·selko sandirokna gita SIT-ko songaha ine East Khasi Hills a·jani Superintendent of Police (SP) Vivek Syiem parakataha.
“Da·o dipet chinga ia mandeni siani bidingo so·otani case-ko segataha aro police-rang, pilakni gitan sandirokna a·bachengataha. Da·o dipet chinga iani bidingo tale agandapna man·kujawa,” ine Syiem aganaha.