TURA: North Garo Hills a·jani A·dokgre jolrango higher secondary skulrang chu·onga gita dongjani a·sel ia bilsini Secondary School Leaving Certificate (SSLC) porikkako pass ka·gipa chatro chatrirang, admission-ko man·jae neng·nikanirangko chagrongna nangtokengani gimin A·dokgre-o donggipa damsamangmang higher secondary skul, chong·motan Rashtriya Madhyamik Shiksha Abhiyan (RMSA) skulo morning shift-ko kulichina aro skulo skigiparangko baridapate, chatro chatrirangna admission-ko on·china, A·chik Holistic Awakening Movement (AHAM) A·dokgre regional unit, a·dokni Chief Minister Conrad K Sangma-na sedoataha.
Chief Minister-na sedoatgipa chittio AHAM A·dokgre regional unit-ni parakatani gitade, A·dokgre jolrango higher secondary gadang donggipa skul RMSA-mangmangsan dongaia indiba ia skulo skigiparang aro biaprang chu·ongjani a·sel class XI-o admission ra·na nangenggipa chatro chatrirangna biaprangko tikatna man·jaenga.
“A·dokgre RMSA-o skigiparang aro skul nokrang chu·onga gita dongjani a·sel chatro chatrirangko ra·dapna chol ong·jaenga aro ia bilsini SSLC porikkako pass ka·gipa bang·a chatro chatrirangan biaprangko man·jae neng·nikanirangko chagrongna nangtokenga,” ine AHAM A·dokgre regional unit-ni president Marchborn R Marak parakatenba, ia skulo songni chatro chatrirangna admission-ko on·na man·na gita morning shift-ko kulichina aro skulna skigiparangna ra·dapchina Chief Minister-ko mol·molataha.