TURA: Medical college-rangko chalaina gita ma·mong sorkarionisa tangka paisarangko chame on·atengani gimin medical college-rangko chalaina private company-rangna on·na nangani katta dongja ine Opposition dolni dilgipa aro a·dokni gitcham Chief Minister Dr Mukul Sangma parakataha.
Sangma-ni aganani gitade, Meghalaya a·doko an·seng baljokani kamrango private company-rangko bak ong·atna nangani katta nakatkujaengani gimin medical college-ko a·dok sorkari an·tangan chalaina nangenga.
Tura Medical College-ko Private-Public Partnership (PPP) mode-o chalaina gita a·dok sorkarini tik ka·engani gimin Opposition dolni dilgipaba iako jegalataha.
Iana skang, Garo Hills-ni dingtang dingtang dolrang aro manderangba, medical college-ko PPP mode-o chalaina gita college-ni administration-ko private company-na on·na tik ka·engani gimin raken jegalgrimtokahachim.
Tura Medical College-ko private company-sa chalaigenchimode ian jolni manderangna maming namgnirang dongjawaha ine iako dingtang dingtang dolrang raken jegaltokenga.
“Health sector-o da·o dipet Meghalaya a·dokoba private company-rangko bak ong·atna nangkujaengani gimin medical college-ko a·dok sorkari an·tangan chalaina nanga,” ine Sangma aganaha.
Sangma-ni aganani gitade, medical college-rangna ma·mong sorkarisa tangka paisarangko on·engani gimin medical college-rangko chalaina private company-na on·aniara kraaniba ong·ja.
“Health sector-ode doctor-rang, specialist-rang, super specialist-rang aro health education-ko man·chape sanna banani pilak kamrangan sorkarini jakosa ong·a aro iani giminsa ma·mong sorkari, medical college donggijagipa a·dokrangna dingtangmancha central pool-ni ning·o tangka paisarangko dakchake on·enga,” ine Sangma aganaha.
Je a·dokrangon medical college-rangko nangenga, uandakgipa pilak a·dokrangnan ma·mong sorkari nangani kri dakchakanirangko on·enga ineba ua aganaha.
“A·dokode medical college-rangko kulina tangka paisarang dongja aro iani giminsa chinga skangoba cholrang dongjani gimin private company-rangchi medical college-rangko kulina cholrangko niachim. Indake ong·genchimoba private company-rangchi chalaianio namgijanirangko nike chinga private company-rangna on·na miksonganiko donpilaiaha,” ine Opposition dolni dilgipa aganaha.
Skangode a·dokrango medical college-rangko kulina tangka paisarang dongjachim indiba da·ode ma·mong sorkarian nangana batpile dakchakanirangko on·engaha ineba ua aganaha.
“Iandakgipa mingsa project-ko matchotchengesa ja·mano gipin project-rangkoba ra·dapechina India sorkari talen aganmanaha. Gipin a·dokrangba iandakesa indakgipa project-rangko man·dapdapenga. Assam aro Tripura-ko niatbo maikai uamang kamrangko ka·enga. West Bengal-ba indakgipa cholrangko ra·en namroro silrorona man·enga. Uni gimin Meghalaya-ba iano ja·manchakna nangja,” ine Sangma aganaha.
