SHILLONG: Meghalaya aro Assam a·dokni gisepo meligrikna man·jaenggipa damdok biaprang, jerangkon skanggipa bako a·dok damgnini sorkarirang agangrike tik ka·grikahachim, ia simarango krongrangko re·baenggipa August 15 tariko songgnok ine Sombar salo, a·dokni Chief Minister Conrad K Sangma parakataha.
Sombar salo a·dok damgnini dilgiparang Guwahati-o tom·e chanchirimangani ja·man iako a·dokni Chief Minister parakataha.
Ia biaprangona agreba, a·dok damgnini gisepo meligrikna man·jaenggipa gipin dambonga biaprangoba iandakgipa sima krongrangko bakan songna ka·dongenga ineba Sangma parakataha.
“Ian Meghalaya aro Assam-ni gisepo meli nangrime donganiko bilakbatatna ja·ku de·ani ong·engaha,” ine ua aganaha.
Gijang aro Tarabari jolrangoba iandakgipa sima krongrangko songna skang, a·dok damgnini gisepo namatna nangenggipa kamrang dongkuenga ine Chief Minister aganaha.
Assam-o chi banenggipani gimin janapatskaengon, a·dok damgnian North Eastern Space Applications Centre (NESAC)-ni kamrangko ra·gatenba, a·dok damgnini gisepo buring bolgrim, chi jokani aro chi ditdoani cholrangko satellite-chi am·sandina tik ka·angaha ineba Sangma parakataha.
