TURA: Rondupara-oni Dadenggre-ona dakanggipa ramani obosta namsrangjaengaha ine Bharatiya Janata Party (BJP) West Garo Hills District-ni general secretary Peterjob A Sangma parakatenba, ia ramako ta·raken taripile on·china gita a·dokni PWD Minister-na sedoataha.
Ia ramara, West Garo Hills a·jani Dadenggre Civil Sub-Division-ni ning·o km 8 ba 9-mang ong·gipa rama ong·a aro ia ramani paktangtangon bang·bea songrang dongani gimin bang·a manderangan ia ramao pangchake janggi tangtokengachim.
Indake ong·engon, ia ramako ru·uta bilsirangnan taridapa gri donaiahani a·sel da·o ia ramako re·rurana namsrangjaengaha ine BJP WGH-ni general secretary parakataha.
“Rondupara-oni a·bachenge km 4-mangona kingkingde ramarang re·tosrangjaengaha aro ia rama gita motorcycle-mangmangba name re·na man·jaengaha. Ia rama gita matchu, matma aro niam gri bol salenggipa garirangna agrede darangan jakkalna gita namjaengaha,” ine Sangma parakataha.
Ia ramani obosta namsrangjaengahani a·selan ia jolrango donggipa manderangni janggi tanganio nangchakeanirangko ra·baenga ine janapatengon, “Ia ramani bidingo songni nokni manderang, PWD aro local MLA-ko man·chape dingtang dingtang official-rangna changni chang badi ka·ahaoba da·alonan ia ramako taridape on·anirang dongkujaenga,” ine Sangma parakataha.
Ia rama namsrangjaengahani a·selan songni manderang, bading chiwalanio, sanna bananirangko ra·anio, aro poraienggipa bi·sarangba skulrangchi re·ruraanirango neng·nikanirangko chagrongna nangtokenga ineba BJP WGH-ni secretary parakataha.
Indake ong·engon, ia ramani obostako nina gita ta·raken PWD-ni official-rangko watatchinan aro ia ramako ta·raken blacktopping on·e tarichina gitaba Sangma, a·dokni PWD Minister-ko didiataha.