SHILLONG: Meghalaya a·dok gita dakgipa tourist-rangni rochakgipa biapo tourist saksako so·otaniara a·dokni manderangna jagokmanpilani gita ong·aha ine Budbar salo, a·dokni Chief Minister Conrad K Sangma aganaha.
Meghalaya a·doko iandake tourist-rangko ka·saninggija dake mesokaniko nikna man·rongjani gimin ian a·dokni manderangna jagokmanpilani gita ong·aha ine ua aganaha.
Madhya Pradesh a·doko donggipa Indore songjinmani tourist saksako so·otani bidingo Central Bureau of Investigation (CBI)-chi sandirokchina dabienggipani giminde ua mamingkoba aganskajaha.
Iani bidingo kobor ra·timgipa manderang baksa agangrikengon, Meghalaya a·dokara tourist-rangni roronggipa biapsa ong·ani gimin darangba iandakgipa a·selrang ong·gen ine chanchisoa dongja aro indita bilsirangna lakni lak tourist-rang a·dokni dingtang dingtang biaprangona re·baengoba iandakgipa a·selrangko nika dongkujachim ine Sangma aganaha.
“Da·o dipet ia tourist-rangna mai ong·a name tale ma·sina man·kujaengani gimin kakketko ma·sina gita chinga raken kamrangko ka·enga,” ine ua aganaha.
Gimakuenggipa me·chikko sandina dingtang dingtang dolrang aro songni manderangba rakbee kamrangko ka·enga ine janapatskaengon, Indore-oni re·bagipa tourist sakgnina maimancha ong·achim uko ma·sina gita sorkari rakbee kamko ka·gen ine Chief Minister ku·rachakaniko on·angaha.
CBI inquiry-ko dakchina dabienggipani gimin sing·on, skanggipa ia a·selni bidingo kakketko ma·sichengna nangenga inesan Chief Minister aganchakaiaha.
“Da·o dipet ia a·selni bidingo mamingkon aganna gita seng·gnangdugakuenga maina ia a·sel ong·anio dingtang dingtang sakkirangko man·engaha. Mikkangchi mai dakgipa ja·kurangko de·gen, uani giminba da·o dipet aganna man·kujawa indiba je manderangan ia a·selo jak dongachim, ua pilakkon rim·na gita sorkari raken kamko ka·enga,” ine Sangma aganaha.
“Kakket bichalko on·na chinga rake kamko ka·gen,” ine Chief Minister aganenba, ia a·sel ong·ani ja·man mitam manderangde Meghalaya-ko dos galna jotton ka·aigen indiba Meghalaya a·dokde skangonin tourist-rangna naljokgipa biapsa ong·a ine parakataha.